استراتيجيات القرائية هامة فى التحضير والإمتحانات شرح وافى و مبسط دون تحميل
أولًا : تحليل الكلمات إلي مقاطع صوتية
*************************************
لما يجي سؤال حلل الكلمات إلي مقاطع صوتية هنعمل ايه :
هنقرأ الكلمة لو مش متشكلة في الورقة ونحاول نشكلها صح مع انه المفروض تيجي الكلمة للطالب متشكلة ومضبوطة .
👈في قاعدة مهمة جدًا لتحليل الكلمات لازم نعرفها
1- اللام القمرية مقطع ...
2- اللام الشمسية والحرف المشدد اللي بعدها نأخذ منه واحد مع اللام ...
3- الحرف المتحرك مقطع ...
4_ الحرف المتحرك والمد لو جه بعده مقطع ... َ
5- الحرف الساكن والحرف اللي قبله مقطع ...
6- الحرف المشدد يتفك مرتين الإول بيكون ساكن
والثاني متحرك ...
👈 أمثلة 👇👇
البحر : ال/ بح / ر ...
الشمس : الش / شم / س ...
قمر : ق / م / ر ...
خالد : خا / ل / د ...
رضا : ر / ضا ...
هند : هن / د ...
الطفل : الط / طف / ل ...
***************************************************
ثانيًا : شبكة المفردات
****************
لما يجي لك سؤال اكتب شبكة المفردات لكلمة كذا المطلوب منك تفكر وتشغل دماغك وتجيب أربع كلمات تانية لها علاقة بالكلمة الأصلية وترتبط بها ....
👈مثال 👇👇
حديقة 👈 زهور / فواكه / أغصان / مياه ...
مدرسة 👈 فصول / معلمون / طرقات / فناء ...
***************************************************
ثالثًا : خريطة الكلمة 👇👇
****************
لما يطلب من إبنك كتابة خريطة الكلمة كذا يبقي المطلوب انه يعمل أربع حاجات يجيب ( معناها . عكسها . نوعها . يحطها في جملة ) ...
👈مثال 👇👇
السعادة 👈 معناها الفرح / عكسها الحزن / نوعها اسم /
الجملة : السعادة في القلوب ...
يتحدث 👈 معناها يتكلم / عكسها يصمت / نوعها فعل /
الجملة : يتحدث المعلم عن النظافة ...
***************************************************
رابعًا : عائلة الكلمة 👇👇
***********
لما يطلب من إبنك يجيب عائلة الكلمة يبقي المطلوب أربع كلمات من نفس جنس الكلمة الأولي .
👈مثال 👇👇
درس 👈 مدرس / يدرس / مدرسة / دراسة / تدريس / دراسات.
زرع 👈 زراعة / زارع/ مزرعة / مزروع / زراعات.
***************************************************
خامسًا : دمج الاصوات👇👇
*******************
ده بقي أسهل حاجة ليه؟ لأنه بكل بساطة هيجمع المقاطع جنب بعض ويكون منها كلمة ...
👈مثال👇👇
ادمج الاصوات الاتية :-
ح / لا / ل 👈 حلال ...
إن / جا / زا / ت 👈 إنجازات ...
****************************************************
سادسًا : المعاني المتعددة 👇👇
*********************
ده سؤال محتاج ذكاء وثروة لغوية وهو انه مطلوب منه يفرق في المعني بين كلمتين شبه بعض في الشكل ...
👈مثال 👇👇
* صليت المغرب في المسجد ...
سافرت المغرب بالطائرة ...
المغرب الأولي : اسم صلاة وفرض من الفرائض ...
المغرب الثانية : اسم بلد عربي ...
* الجبن سلوك اللصوص ...
الجبن طعمه لذيذ ...
الجبن الأولي : صفة مذمومة ...
الجبن الثانية : طعام ...
*****************************************************
سابعًا : الصفة المضافة 👇👇
**************
السؤال ده درجته مضمونة لأنها بتتكلم عن النعت
هيطلب من إبنك أنه يكمل الجملة بصفة مضافة أو أنه يختارها
من بين الأقواس وهي صفة تصف المتحدث عنه ...
👈مثال👇👇
وقف التلميذ ........ طبعًا هنختار كلمة المتفوق ...
ركبت القطار ...... ( الطازجة - السريع - المتفوقان ) ...
*****************************************************
ثامنًا : مفاتيح السياق 👇👇
*****************
ده كمان سؤال صعب محتاج تركيز وهو أنه هيجيب للطالب جملة فيها كلمة مش مفهومة ومطلوب منه استنباط معني الكلمة من خلال فهم الجملة ...
👈مثال 👇👇
* قص الاب حكاية ...
هات معني كلمة قص ؟ ...
طبعًا معني قص حكي مش قطع ههههههههه
بس ايه اللي عرفني إنها حكي مش قطع مفاتيح السياق اللي هي كلمة ( حكاية ) ...
* عاد الأب مريضًا ...
طبعًا الكل هيقول عاد يعني رجع ... أيوه صح √
بس لها معني تاني وهو زار 😜
بس ايه اللي عرفني أنها زار ؟
أيوه بالضبط كدة 👏
كلمة ( مريضًا)
في إجابة السؤال بكتب مفاتيح السياق وليس معني الكلمة ...
👈هات مفاتيح السياق لما تحته خط في الجمل التالية :-
*** يقطف الطفل وردة ( معنى يقطف : يقطع / مفاتيح السياق لكلمة يقطف ( الطفل - الوردة ) ...
👈الشرح 👈 لو تأملنا هذه الجملة سنجد مفاتيح السياق لكلمة يقطف في الجملة ( الطفل - وردة ) وهى الكلمات التى فهمت من خلالها أن معنى يقطف يقطع ...
*** يروى الفلاح الزرع ( معنى يروى : يسقى
مفاتيح السياق لكلمة يروى ( الفلاح - الزرع ) ...
👈الشرح 👈لو تأملنا هذه الجملة سنجد مفاتيح السياق لكلمة يروى في الجملة ( الفلاح - الزرع ) وهى الكلمات التى فهمت من خلالها أن معنى يروى : يسقى ...
*** منظر القمامة يؤذى العين ( معنى يؤذى : يضر
مفاتيح السياق لكلمة يؤذى ( القمامة / العين ) ...
***************************************************
تاسعًا : شكل فن 👇👇
**************
مش هعرف ارسمه في الشرح بس أظن الناس فكراه من أيام الرياضيات اللي كنا بنأخذها في إعدادي ...
وهو عبارة عن دائرتين متقاطعتين مع بعض الجزء المشترك بينهم هنحط فيه الحاجات المشتركة بين الكلمتين والباقي الأشياء المختلفة في الأماكن اللي مش مشتركة ... هههههه ...
شايف واحد مطلع لسانه ومش فاهم ماهو أنا مش عارف ارسمهالك هههههه ...
👈المثال هيوضح 👇👇
مثلًا طلب منك شكل فن لكلمتين هما المدرسة و الحديقة ...
* ايه الحاجات المشتركة 👈 مقاعد / زهور / رمال ...
* ايه الحاجات الموجودة في المدرسة ومش موجودة في الحديقة 👈 تلاميذ / حاسب ألي / فصول / معلمين ...
* ايه الحاجات الموجودة في الحديقة ومش موجودة في المدرسة 👈 فواكه / أحواض / زهور / أقفاص / حيوانات ...
*****************************************************
في النهاية أتمني أن يكون هذا العمل خالصًا لوجه الله تعالى ...