أوائل ورابط الثانوية الأزهرية 2025

 لطلاب الثانوية العامة 2021 الدليل الكامل للمساعدة فى التعرف على تنسيق الجامعات و اختيار الكلية المناسبة للميول و المجموع

لجميع الطلاب المقبلين على فترة التعليم الجامعي، نستعرض مجموعة من التقارير التي تقدم معلومات تفصيلية عن الكليات باختلاف مجالاتهما العلمية، وكيفية التقديم، والأقسام والتخصصات، والجامعات التي تتواجد بها، وفرص العمل بعد التخرج.

 --------------------

 #كلية_الهندسة
◾أصعب كلية في مصر معايا ؟🤔
- أيوه اتفضل حضرتك 📏📐
◾اعرف منين إذا كنت مناسب ليكي ولالا؟
- لو انت بتحب الرياضة والفيزيا 😁فحط هندسة رغبة أولى
ولو بتحب التفكير و الإبداعي خصوصا بردو حط هندسة رغبة أولى أما بقى لو بتحب الفيزيا والرياضة والكيميا شوية فبردو تعمل ايه؟ تحط هندسة رغبة أولى
◾هندسة من الكليات ال بتتطلب مذاكرة ومجهود كبير لأنها بتعتمد على حل المشكلات
*نظام الدراسة:
5 سنين دراسية.. أول سنة إعدادي و 4 سنين تخصص.
◾في إعدادي بتدرس نفس مواد ثانوي مع بعض الإضافات طبعا في كل مرة ما أنت بقيت مهندس أد الدنيا✌
- هتدرس فيزيا وميكانيكا ورياضة ودول مواد أساسي معاك
- هتدرس رسم هندسي وهتتعلم إزاي تستخدم 《T》📏 في الأول هتحس إنه صعب لكن بالوقت بتتعود
- هتدرس مادة برمجة وهتتعرف فيها على حاجات جديدة زي السي ++ أو الماتلاب
- هتدرس مادة إنتاج ودي مادة نظري ولكن بتنزل فيها ورش وبتشوف ماكينات لأول مرة في حياتك🤓
◾في آخر إعدادي بتحدد القسم ال نفسك تكمل فيه وطبعا تقديرك في إعدادي هو ال بيحدد إذا كنت هتقبل في القسم ده ولالا، ومش معنى أن القسم تقديره عالي يبقى هو صعب، لا خالص هو الإعتماد بيبقى على عدد ال عايزين يدخلوا القسم والعدد ال القسم بيستوعبه من الأساس ✅
◾بعد كده التخصص بيبدأ من تاني سنة، وفي السنة التالتة بقى بيحصل عملية التشعيب وهى اختيار شعبة أو فرع جوا القسم ال أنت اختارته قبل كده
مثال : 《طالب هندسة إختار في سنة أولى قسم كهربا وفي سنة تانية قرر إنه هيدخل إتصالات وهي شعبة من كهربا 》
◾وفي جامعات بيكون التخصص في القسم في سنة اولى 《مثال أولي كهربا باور》 زي هندسة المنصورة.
◾طبعا تقسيمة الأقسام والشعب او التفريعات بتختلف من جامعة لجامعة بس إحنا بنتكلم هنا عن الأصل والأساس
*أقسام هندسة مش كلها موجودة في كل الجامعات
لكن فيه 4 أقسام مشتركين تقريبا بين كل الجامعات، وهما:
《عمارة- مدني- ميكانيكا- كهرباء.》
◾قسم مدني :
الهندسة المدنية قسم شهير من اوائل اقسام الهندسة، بيتشعب وبيتفرع ل :
هندسة طرق وكبارى، انشاءات وتشييد، خرسانة ،هندسة صحية، هندسة الرى المساحه، هندسة المواد.
 المواد الاساسية《 الرسم الهندسى، ماده اسمها Structure》 ، ومن كل قسم بتدرس مادة ..لكن المواد الاساسية اللى هتكمل فى كل السنين تقريبا المادتين دول.
المهندس المدنى هو اللى بيقوم بتصميم وتنفيذ المنشآت، المهندس المدنى يقدر يشتغل حر او فى مكتب انشاءات او التوظيف فى شركات المقاولات.
◾قسم عمارة :
 قسم بيربط بين الهندسة والفن 😋
عمل المهندس المعمارى عملية إبداعيه ازاى تطوع كل القدرات الهندسية اللى عندك عشان تطلع نتيجة جميلة، هو مكمل لعمل المهندس المدنى، 《وناس كتير بيحصل عندها خلط بين الاتنين رغم إنهم مختلفين عن بعض جدا》كمان المهندسين المعماريين بيهتموا بترميم المبانى التراثية.
◾قسم كهربا :
بيعتمد على الفيزياء  يعنى عشان تدخل كهربا لازم تكون متميز وبتحب الفيزياء والرياضيات لأنهم أساس الدراسة فى القسم.
فروع أو شعب الهندسة الكهربية :
1-الاتصالات .
2-التحكم.
3-القدرة.
4-حاسبات.
◾قسم ميكانيكيا :
يعتبر من أجمل الأقسام في هندسة  الا انه من الأقسام اللي محتاجه جهد وجدية في العمل ومذكرة كتير أكتر من الأقسام التانية ومحتاج إن دماغك تبقى شغالة طول الوقت
- ميكانيكا فيها فروع: باور، إنتاج، سيارات، ميكاترونكس.
(ميكاترونكس يعتبر قسم خاص، والميكاترونيكس بيربط بين عدة علوم وتخصصات فى فرع واحد وهى الميكانيكا والكهربا والالكترونيات البرمجة وهندسة التحكم والتصميم) يعني 6×1 😎
◾بعض الجامعات بتبقى الفروع دي أقسام منفصلة، يعني التخصص على طول بيبقي حاسبات، من غير كهرباء زي القاهرة مثلا زي ما قولنا قبل كده كل جامعة بتطبق نظامها الخاص بيها
◾فيه أقسام تانية مش موجودة في كل الجامعات زي:
تعدين وبترول《ليهم كلية لوحدهم ده غير إن ليهم قسم لوحدهم كمان 》
 وكيمياء وأجهزة طبية وطيران وفضاء وغزل ونسيج.
- بعد إعدادي بتعرف كل التفاصيل عن الأقسام.
◾كلية هندسة كلية ممتعة جدا ل ال دماغه فيها، الكلية مش صعبة ومش سهلة.. الكلية محتاجة مجهود عالي، لو مش داخلها عن رغبة قوية منك هتتعب فيها جامد.
- بنسمع كتير ناس بتقول إنت بتدخل هندسة متعرفش هتخرج منها ولالا😭 الكلام هيبقى حقيقي لو مذاكرتش ومنظمتش وقتك ومبذلتش المجهود ال الكلية تستحقه وعموما الكلية بتفيدك في حياتك بعد كده بتعرفك إزاي تنظم وقتك وحياتك وده كله هتكتشفه بالممارسة👌
◾ وعلفكرة سهل تجيب فيها تقدير، وسهل تخلصها في خمس سنين بالظبط، وتتخرج منها سليم 😃 لكن الرغبة والإرداة ليهم عامل كبير في كده.
في النهاية دي أصعب كلية في مصر يا عم أنت بتقول إيه؟🤣
==================

#كلية_الطب_النظام_الجديد
- كلية بتدخلها مبتخرجش منها؟🤔
- كلية بتدخلها طالب بتطلع منها طالب بردو ؟😲
- ده كان زمان دلوقتي نظام الكلية اتغير خالص وهنقدر نعيش حياتنا بقى😎
◾فى البوست دا هنتكلم عن نظام مختلف لكلية الطب
نظام الـproblem based learning وهو إنك تعرف المشكلة وحلها وتحلها في نفس الوقت ، ده متطبق في كلية طب جامعة قناة السويس و طب بورسعيد وطب السويس وبعض الكليات الخاصة وموجود في كليات تانيه بس كل كلية بتطبقه من منظورها الخاص
◾ في basic السنة بتتقسم لبلوكات فب الأغلب بيبقوا 6 وتقسيمتهم بتبقى مختلفة من جامعة لجامعة ممكن جامعة تدرس 3 في ترم و 3 في ترم تاني وممكن 4 و2 حسب يعني متغير
- إيه هو البلوك أو الموديول ده بقى؟
- البلوك هو مجموعة تعيلمية بتاخد فيها كل ما له علاقة بجزء معين من جسم الإنسان مثلا المعدة ،هتاخد كل ما يتعلق بالمعدة في كل المواد لحد ما تدرسها كلها وتبقى مُلم بكل أجزائها بعدين تنتقل على جزء تاني وهكذا
 البلوك بقى متقسم لمجموعة من المشاكل 3 ل 5 مشكلات ، كل مشكلة بتاخد أسبوع مثلا ممكن تاخد أكتر أو أقل حساب نظام الجامعة
- إيه هيا المشكلة بقى ؟
- هقولك يا سيدى ،  الكلية بتنزل مع بداية كل أسبوع مشكلة problem ، بتتناقش أنت وزمايلك في المشكلة و تتطلعوا في الاخر بمجموعة من التساؤلات عشان تفهموا طبيعة المشكلة و حلها وهو ده الهدف إن انتوا تكتشفوا وتفهموا طبيعة الجهاز أو الجزء ده بنفسكم وتقدروا تتعاملوا مع مشاكله وتشخصوها.
◾  التساؤلات ديه بنسميها أهداف ، بعد كده و لمدة أسبوع بتكون المحاضرات و المعامل متعلقة بالمشكلة دي
 في اخر الأسبوع بتجتمع بزمايلك و تقدموا حل للمشكلة في ضوء دراستكم طول الأسبوع
 مع نهاية الترم ( المكون من 3 بلوكات غالبا ) بيكون الإمتحان
◾ الإمتحان مبيكونش كل مادة لوحدها ، هتمتحن 3 امتحانات كل امتحان على بلوك لوحده
◾من مميزات النظام ان المواد بتكون مرتبطة ببعض يعني البلوك الواحد لو فيه 3 مواد مثلا فال 3 هيبقوا بيتكلموا عن نفس الجزء وده هيسهل عليك في المذاكرة ، كمان درجة النجاح في الامتحان بتتحسب بالبلوك كله مش بعدد المواد يعني لو البلوك فيه 3 مواد وأنت ذاكرت 2 بس هتنجح
《بس خد بالك وذاكر كويس عشان تعالجنا متموتناش")) 》
◾من عيوبه ان فى كليات امتحان البلوك الواحد كل سؤال بيجي على مادة ، فلو عرفت تحل السؤال هتاخد درجة المادة ، معرفتش تحله يبقي كده المادة راحت عليك غالبا
🗯 النظام ده بيعتمد على التعلييم الذاتى self learning ف بعض الكليات يعني مفيش كتب بتنزل فى الكلية ، انت اللى بتدور وبتشوف المصادر و المراجع المناسبة وتذاكر منها ،لكن في كليات بتنزل ليها كتب خاصة بيها عادي
《والحقيقة مش معروف هل دي نقطة إيجابية ولا سلبية؟》
◾اخيرا بالنسبة للتكليف و الامتياز فهو نفس النظام اللى اتكلمنا عنه فى بوست كلية الطب ال traditional
- طيب سمعنا عن ان هيكون فى تغيير هيحصل ونظام جديد لكل كليات الطب فى مصر ؟
- دا حقيقى ، فى قرار نزل بإن كلية الطب هتبقى 5 سنين و سنتين امتياز ( او اسمهم تدريب اكلينيكى ) ، وهتبقى بنظام الساعات المعتمدة ، وغالبا هيطبق فيها نظام الـproblem based learning اللى اتكلمنا عنه فى البوست ودا بيختلف تطبيقه من كلية للتانية وبالفعل النظام ده بدء تنفيذه من السنة الفاتت
◾فى النظام الجديد هتنزل المستشفى وتشتغل عمليا من اول سنة فى الكلية ودا برضو ف بعض الكليات ولكن ف النظام ككل الطلبة بتنزل المستشفيات بدري عن النظام القديم يعني بتمارس ال بتدرسه وده الصح✅
◾و هيكون فيه برنامج جديد اسمه البورد المصرى ، هيكون إلزامي على كل الاطباء إنهم يجتازوا اختبار البورد المصرى اللى هيكون موحد على كل كليات مصر ، ودا شرط اساسي لمزاولة المهنة
《عشان نتأكد بردو إنك كدكتور هتعالجنا واحنا غلابة🤓》
◾النظام مختلف عن نظام التدريس العادي  traditional ال اتكلمنا عنه فى البوست اللى فات ( هتلاقى لينك البوست فى اول كومنت ) أكيد لاحظت ده مش كده ⁉️
◾اخيرا النظام لسه متطبقش كامل ، وبالتالى لسه مش واضح تماما كل تفاصيله ، لكن ان شاء الله هيكون افضل لطلبة الطب 

--------------------

كلية الطب نظام قديم
مقالنا هيتكلم عن طب ونظام الدراسة فيها وغيره..
(آه هو مقال 😂 وتفتكر لو مش هتصبر ع مقال خمس دقايق قراءة هتصبر ع 7 سنين دراسة؟ 🤔)
ودا أول تحدي ف كلية طب إنها عدد سنينها طويلة شوية 😁
وبما إنه مقال فممكن تكسلوا تقروه للآخر، بس دا كويس عشان فعلًا المقال ده للمهتمين فقط. 👌
عشان مينفعش تدخل الكلية دي بالذات (أو غيرها) من غير شغف، من غير إهتمام، مينفعش تضيع سنين ومجهود من عمرك وإنت أصلًا داخل عشان ماما وبابا عايزين كده وإنت أحسن من ابن خالتك الدكتور وبلا بلا، مينفعش إطلاقًا.
نبدأ بسم الله ^^
📍التنسيق:
كلية طب عمرها ما قلت عن 97,5% أيًا كانت الجامعة، وأقل مجموع بيبقى للقاهرة واسكندرية عشان مساحتهم أكبر وبيستوعبوا عدد طلبة أكبر وكل ما بقت الكلية أصغر زي المنصورة وطنطا مجموعها بيعلى، ودا عامل أساسي ف التنسيق 😃
وبالتالي طب محتاجة مجهود قبل وبعد وأثناء دراستها، فتلاقي طلبة طب مستحيل يقتنعوا بجملة " اتعب دلوقتي عشان ترتاح بعدين" 🤷‍♀️
📍نظام الكلية ودراستها:
الكلية في مصر 7 سنين: 6 دراسة، وسنة امتياز
(سنة امتياز = سنة تدريب عملي إجباري بتطبق فيها كل ال درسته ال6 سنين، وبيكون في مستشفيات الجامعة، وهنتكلم عنها بالتفصيل تحت).
أما عن ال6 سنين دراسة فابيتقسموا علي مرحلتين:
- المرحلة الأكاديمية.
- المرحلة الإكلنيكية.
- المرحلة الأكاديمية:
هي أول 3 سنين، وبتكون دراسة أكاديمية بتدرس فيهم مواد نظري زي الأناتومي (علم التشريح)، فسيولوجي (علم وظائف الأعضاء)، هستولوجي (علم الأنسجة)، فارماكولوجي (علم الأدوية)، بيوكيمستري (كيمياء عضوية)، جينتكيس او الامبريولوجي (علم الوراثة)، باثولوجي (علم الامراض)، باراسيتولوجي (علم الطفيليات)، ميكروبيولوجي (علم الكائنات الدقيقة).
والمواد في ال٣ سنين دول مش أقل من 4 مواد وف بعض الجامعات بيبقوا 6 .
- المرحلة الإكلينيكية:
تاني 3 سنين، بتكون دراسة إكلينيكية clinical، ومن معناها بتتعامل فيهم مع المريض بنفسك وبتدرسهم عمليًا وبتدرس فيهم المواد اللي هتتخصص فيها بعد الكلية زي الأطفال و الباطنة والجراحة والرمد و ونسا وتوليد وطب المجتمع وهكذا.
📍الامتحانات:
معظم الجامعات في مصر ماشية بنظام السنة الواحدة يعني مفيش امتحانات فاينال بعد نهاية الترم الاول لا، المنهج بيكمل معاك وبتمتحن مرة واحدة آخر السنة زي القصر العيني والمنصورة وطنطا وشبين الكوم، لكن في جامعات ودي عددها أقل بتمتحن فاينال بعد كل ترم زي بنها.
أما جامعة اسكندرية فيها نظام (الموديول)، يعني إيه؟
يعني بناخد جهاز في جسم الانسان وبندرس كل مواده مرة واحدة وتمتحن علي كل جهاز.
مثال: هتيجي تدرس القلب هتدرس المواد النظري كلها مرة واحدة للجزء اللي يخص القلب وبعدين تمتحن على المواد دي في آخر الترم، وبعدين الجهاز العصبي مثلا تاخد كل ال يخصه وتمتحن وهكذا.
خلصتوا إمتحانات سنة سادسة على خير؟ 🎉
بعدها بكام شهر تظهر نتيجتها ومتاح التظلمات 🤝
وبعدها هتطلع نتيجة المجموع التراكمي (مجموع درجاتك في ال6 سنين)
بعد المجموع التراكمي عندنا حاجتين مترتبين عليه:
1. الترتيب العام للدفعة (الأول ع الدفعة والتاني وهكذا)
2. التقدير العام: امتياز، جيد جدًا، جيد، مقبول.
⚠️ممكن تسمع لفظ "تقديرك(وليكن امتياز) مع مرتبة الشرف" معناها إن مفيش ولا سنة من ال6 سنين تقديرك قل عن امتياز، وهكذا.
المجموع والترتيب ده بقى هيفرق معاك في كل حاجة تقريبا جاية في طريقك بعد كده، فلازم تركز وتذاكر من الاول 😀
📍سنة الامتياز:
زي ما قولنا هي سنة تدريب إجبارية، وهي شرط عشان يبقي معاك شهادة معتمدة سواء جوا مصر أو براها 😅
بمعنى انك دلوقتي خلصت ال 6 سنين بيكون معاك "شهادة تخرّج مــؤقـــتة" لحد ما تاخد الامتياز بتاعك ويبقي معاك شهادة رسمية 👌
سنة الامتياز بتبقي 12 شهر بالتمام والكمال بتبدأ غالبًا في 1 مارس بعد النتيجه ما تظهر، وبتشتغل طبيب إمتياز في مستشفيات الجامعة الرئيسي وبتتعامل مع المرضى في عنابر وعيادات المستشفي وبتكون مسئول عنهم وعن متابعة علاجهم ونباطشيات نهار وليل وكده.
ممكن تقضي جزء من سنة الامتياز في مستشفيات جامعة تانية أو في مستشفيات وزارة الصحة في أي محافظة تانية عادي، وممكن تقضي كذا شهر منه في دولة تانية خالص بس بتتدرب على تخصص معين على حسابك.
⚠️كل ده له شروط وإجراءات وقواعد بتعرفها بعد كده
بعد ما خلصت الامتياز علي خير مبروك انت اخيرًا معاك بكالريوس الطب والجراحة وفعليا اتخرجت وبيعملولك حفلة التخرج الرسمية، وهتنضم بعدها لنقابة الأطباء وتعمل "ترخيص مزاولة المهنة" ومهنتك "طبيب بشري - ممارس عام" مبروووك 🎉🎉🎊
بس لا البوست مخلصش لا 😁
وافتكر ان انت اللي دُست "قراءة المزيد" و أنت ال اخترت تكمل اوكيه؟ 🤭😂
📍 التكليف
هو فترة عمل إجبارية لأي طبيب عاوز يشتغل ويكمل في وزارة الصحة، أنت بتتوزع فيها على الوحدات الصحية ومراكز طب الأسرة ومكاتب الصحة.
وفيه نوعين رئيسيين:
1. إما بتتوزع على وحدة داخل المدينة
2. أو بتتوزع على المناطق النائية زي المحافظات الحدودية (مطروح وسينا والبحر الأحمر وأسوان وغيره، أو بعض المناطق الصحراوية)، وال غالبا بتبقي باختيارك.
طيب ليه واحد هيروح باختياره الأماكن دي؟ 🤔
بيقي ليها مزايا مالية وإدارية ومزايا ليها علاقة بالنيابات هتعرفها بعدين.
طيب التكليف بيحصل إزاي؟
في آخر شهرين في الامتياز (الي هما يناير وفبراير) كل الدكاترة ال اتخرَّجوا من نفس الدفعة على مستوى الجمهورية بيسجلوا رغبات التكليف على النت في مكان وموقع واحد، والرغبات ليها قيود.
📍خلصنا 6 سنين دراسة وسنة امتياز وتكليف، نروح للتخصص بقي 😁
التخصص هو آخر حاجة ف طب، ومنطقي جدا تبقي فاهم فكل التخصصات عشان لو جالك مريض تعرف تشخصه صح، وكمان لو هو مش تخصصك تعرف توجهه للتخصص الصح 👌
📍وبعدين مرحلة النيابات ال فيها التخصص الفعلي وال بيكون من خلال إنك تحضر ماجيستير في التخصص اللي إنت عايزه.
وبكدا تكون خلصت رحلتك الأكاديمية، وبتبدأ عالم الشغل وممارسة الطب

================

#الطب_البيطري 😍
لما عمو بيسألنا هتدخل ايه ي حبببي
طب بيطري يا عمو
خيال عمو: 🦓🐄 🐸
ودا للأسف حال معظم الناس في مصر لأننا معندناش الوعي الكافي ولا مدركين أهمية الكلية ومجال زي ده ودا دورنا في غرناطة اننا نقولكم على كل المجالات وفرص شغلها وأهميتها
ومتاكدين انكم بعد م تكملوا البوست هنغيرلكم الفكرة دي خالص عشان لما عمو يسالكم بعد كدا تردوا عليه وبقوة😎
الكلية ترتيبها الخامس في مصر بعد البشري واسنان والصيدلة وعلاج وبتاخد من رنج ٩٥ ل ٩٧
مدة الدراسة فيها 5 سنين بتتخرج بعدها ببكالوريوس الطب البيطري.
-بالنسبة للمواد :
بتكون زي أي كلية طبية وطبعا مش محتاجين نقول إنه الدراسه كلها انجلش بتدرس في أول سنة تشريح وفسيولوجي وهستولوجي وكمياء حيوية وبيولوجي ووراثة وسلوك حيوان .
-والتشريح في أولي مثلًا بيكون تشريح عضم ومن أول سنة تانية بنبدأ نشرح الجسم كله organsو brain .
-سنة تانية وتالتة بنكمل المواد الأكاديمية (باقي الهستولوجي والفسيولوجي والكمياء ) و التغذية والتربية والإنتاج الحيواني ، تربية وإنتاج الأسماك🐟 ، والفارما والبكتيريا والدواجن ... الخ .
-أما بقى ياسيدي من سنة رابعة هتبدأ الشغل الجد الممتع 😍
و هو بيبقي طب شرعي وباطنة وجراحة وتوليد وإنتاج ألبان والرقابة الصحية ع اللحوم وهكذا .
-والكلية طبعًا بيكون فيها عملي كتير مش كله نظري و ابسط ياعم سنة أولي كلها بتكون في المشرحة يعني مفيش تعامل حقيقي مع الحيوان وهو حي..
-نيجي لمجالات الشغل :
الشغل مش مقتصر بس على التشخيص لا مجالات شغل الطبيب البيطري كتييييرة جدا حدث ولا حرج 😁
الطبيب البيطري بتاع كله (هو طبيب بشري وأسنان وصيدلة ف شخص واحد ) شخص واحد بيشخص ويحدد ويعالج ويوصف الدوا ويوفره ويحس بكائن حي خلقه ربنا بيحس وبيتألم ولكنه لا يستطيع وصف ما يشعر به وهنا يتجلي دور طبيب الإنسانية 😍.
-إنت ممكن تفتح صيدلية بيطرية و يكون مشروع حلو جدًا ..
أو ممكن عمومًا تشتغل في أي صيدلية بيطري.
-ممكن تشتغل كمان في مزارع دواجن أو سمك أو خيل أو إنتاج حلاب أو إنتاج لحوم ، فيه كمان مزارع الجيش.
- أو عيادة بيطري سواء تفتح عياده لنفسك أو تبدأ في الأول مع حد ودي بيكون فيها التشخيص والعلاج . 😃
وممكن لو مش حابب تتعامل مع الحيوانات الكبيرة زي الحصان والبقر وكده تفتح عيادة pets بس وتتعامل مع الققط والكلاب بس🐱🐶 .
- قدامك كمان الشغل في المستشفيات البيطري وممكن كمان تشتغل في معمل تحليل أو تفتح معمل تحاليل بنفسك بس لازم بعد ما بتاخد دبلومة تخصص 💉.
-وعندك كمان مجال الجودة و المراقبة الغذائية ودي بتكون مشرف على المستشفيات و مدن جامعية وموانيء ومطارات وأماكن سياحية والجمارك والمطاعم والمصانع والشركات زي جهينه والمراعي .
-أو ممكن تشتغل في صناعة الادوية أو تجارتها أو في شركات أدويه عمومًا أو ال (medical rip ) اللي هي دعاية للأدوية وده كويس جدًا .
-أو سهل إنك تعمل أي مشروع مع أصحابك لتربية حيوانات، ده غير مديريات الزراعة والوحدات الييطرية والحاجات ديه .
-اما الولاد فأنت ممكن بعد م تخلص تاخد ٦ شهور ظباط متخصصين ومنها تخرج تشرف في مزارع الجيش
-وبالنسبة للخمسة الأوائل فممكن تتعينوا في الكلية أو معهد البحوث أو تتعين في وحدات بيطرية.
-اما بالنسبة للتخصصات والأقسام :
فعمومًا الكلية مبتتخصصش فيها غير لو هتعمل ماجستير و دكتوراه ، ووقتها ببتاخد تخصص معين وبتحضّر فيه دراستك.
-غير كده مفيش غير جامعة بنها هيا الي بيكون فيها قسمين : يا قسم فارما يعني أدويه وكده , أو فود كونترول اللي هو جودة ومراقبة أغذية , وبتختار من أول سنة وقبل ما تدخل هتاخد أنهي قسم عشان على أساسه بتحدد المواد اللي هتدرسها.
في النهايه احنا حابين نعرفك إن الطب البيطري طب وقائي رقابي علاجي .. وهو خط الدفاع الأول عن صحة الإنسان (غير دوره طبعا ف تحسين صحة الحيوان ) لأنه بيمنع انتقال أكتر من 200 مرض مشترك من الحيوان للإنسان واللي ممكن تسبب الوفاة وبكدا نقولك ان الطب البيطري بيلعب دور مهم جدا في حياتنا ك بشر مش بس حيوانات..
-وفي الأول والآخر إنت بتنقذ روح كائن بيتألم , واللي من غير الروح ديه دايرة حياتنا مش هتكمل , فخليك فخور باللي إنت بتعمله وهتدرسه وكل واحد ليه دوره الي اتخلق عشانه.. 😉
=================
#كلية_العلوم
النهارده هكلمكم عن الجنـدى اللى ميعرفهوش ناس كتير واللى بالإجماع من اصعب الكلـيات اللى موجودة .. علشان لما تيجى متتفاجئش 😉
كليــة الدحيحة والناس اللى دماغهم بتلسع منهم، الكليه الام لكليات الطب والصيدلة .. بطل الحلقة وكل حلقة.. #كلية_العلوم 🔥
الكلية اربع سنين وبتقبل علمي علوم ورياضه لكن التنسيق بيختلف وموجوده في معظم جامعات مصر وحالياً بتدرس بنظام الساعات المعتمدة كمان الدراسة بالإنجلش وطبعا اول م بتقرأ دا بتتخض بس متقلقش😂
كلنا حصلنا نفس اللي حصلك دا وحاليا لو ذاكرنا بالعربي نتلخبط
 بس فيه نقطة مهمه جدا وهي إن علوم بتختلف من جامعه ل جامعه في التخصصات والأقسام يعني ممكن تلاقي قسم هنا متلاقيهوش هناك وهكذا
نيجي بقا لطبيعة الدراسة في الكلية.
كلية علوم من الكليات العملية والنظرية في نفس الوقت وعلى حسب تخصصك وقسمك يعني القسم الي انت فيه عملي اكتر ولا نظري والكليه مش صعبه ومعقده علي اد ما هيا تقيله ومودها دسمه
في اول سنة عندك نظامين
١.يا تدرس كل المواد بتاعت كل الاقسام بس فيه مواد اساسيه لازم تاخدهم ( رياضه – كيميا «عضوية وغير عضوية» – فيزيا - جيولوجيا - مواد أدبية زي حقوق إنسان) وباقي المواد بتختلف من جامعه للتانيه والتخصص بيبقى حسب تقديرك في أولى
٢.يا تتخصص من أول سنة زي نظام جامعه قناه السويس وبيبقى نظام اختيار القسم حسب المجموع في الثانوية العامة وماشيين بنظام المجموع الاعتباري ودا بيتغير كل سنة
ندخل بقا في الأقسام .. وبكرر عليك الاقسام دي هتلاقيها في جامعه وعادي متلقيهاش في التانيه ..
وفيه اقسام لازم تدخلها لو انت علمي رياضه بس او لو انت علمي علوم بس ..
وفيه اقسام مشتركه ممكن تدخلها لو انت علوم او رياضه ..
وفيه اقسام اي حد يقدر يدخلها عادي يعني بيختلف حسب القسم وحسب نظام الجامعه
فبص يا سيدي اللي هعمله اني هذكرلك اغلب الاقسام اللي موجودة في الجامعات وانت بدورك هتدخل على موقع الجامعه بتاعك وتشوف اللايحه بتاعتهم وتشوف الأقسام ايه وكل التفاصيل. تمام؟
تمام.🤝
(1) أقسام بتقبل القسمين "علوم ورياضة" :
١.قسم الكيميا
٢.قسم الكيميا الحيوية "بايوكيمستري"
٣.قسم الكيميا الحيوية والحشرات
٤.قسم الجيولوجيا
٥.قسم الجيو فيزيا
٦.قسم الجيولوجيا والكيميا
(2) أقسام بتقبل علمي علوم "فقط" :
١.قسم الميكروبيولوجي
٢.قسم الكيميا الحيوية
٣.قسم البايوتكنولوجي
٤.قسم نبات وكيميا
٥.قسم حيوان وكيميا
٦.قسم الميكروبيولوجي والكيميا
(3) أقسام بتقبل علمي رياضه "فقط" :
١.علوم حاسب " computer science "
٢.بايو فيزيكس
٣.الالكترونيات والكيمياء التطبيقية
٤.الرياضة البحتة والاحصاء
٥.الكيميا البيئية
٦.قسم علوم البحار
وفيه جامعات بتدمج الاقسام مع بعض يعني مثلا
١.فيزيا وعلوم حاسب
٢.فيزيا ورياضه
٣.رياضه وعلوم حاسب
٤.فيزيا وفلك
وهكذا ..
طبعا انت متنح دلوقتي ولا فاهم اي حاجه من اللي بقولها دي😂
متقلقش انا هديلك نبذة عن بعض التخصصات اللي ذكرتهم فوق دول واللي اغلبهم هتلاقيه في معظم الجامعات بس صحصح معايا كدا 💪
• علوم حاسب : بتتعلم البرمجة والسوفت وير والهارد وير و رغم ان حاسبات و معلومات فيها سوفت وير و هارد وير بس في علوم حاسب لغات البرمجه فيها بتبقى عتيقه و دماغك بتبقى اعلى بس المشكله في المواد نفسها لكن لو خدت كورسات بره بتبقى اعلي من بتاع حاسبات ومعلومات بكتير
وبعد الكليه ممكن تشتغل في البرمجه وفي اي شركه وتعمل سيرڤر والمواقع بتاعتها وممكن كمان تشتغل في موضوع الsecurity من الهاكرز.
•رياضة : لو بتحب الرياضه حب جنوني ادخله يا كبير لكن لو كويس فيها بس أو مش بتحبها يبقي انساها خالص و شغلها في مصر للاسف قليل
ممكن تشتغل في معامل الابحاث او  دكتور في الجامعه او تاخد سنتين تربيه و تبقي مدرس.
•علوم فضاء : هتدرس كل حاجة خاصة بالاتصالات و الأقمار الصناعية و مركبات الفضاء و الميكانيكا السماوية والهندسية وهتعرف منه شكل و تركيب الأقمار الصناعية
فرص الشغل زى المرصد - هيئة الأرصاد الجوية - البحث العلمى - المركز القومى للبحوث - مراكز مراقبة الطقس - المراكز البحثية الفلكية - الاستطلاعات فى الجيش و المخابرات العامة.
•الفيزيا : قسم اعتبره للعباقره فقط وعاوز واحد بيعشق فيزيا جدا
بيدرس فيزيا كهربيه و حراريه و شغله في معامل الابحاث او  دكتور في الجامعه او تاخد سنتين تربيه و تبقي مدرس وفي مصانع الاجهزه الكهربيه وشركات الكهربا  
•كيميا حيويه : بيدرس العمليات الحيويه في جسم الانسان زي البروتين و الفيتامينات و الكربوهيدرات و الاحماض النوويه و الانزيمات و الهرمونات و الاورام كمان بيدرس البيولوجي بتاع الخليه و علم الوراثه و المناعه
شغله بيقى في معامل التحاليل ولو عاوز تفتح معمل بأسمك لازم تاخد دبلومه تحاليل طبيه و طبعا شغله موجود في شركات كتير زي الادويه وهكذا
•كيميا ميكروبيولوجي : بيدرس الفسيولوجي بتاعت الكائنات الدقيقة (بكتريا وفيروسات و....)  وحياتها وكل حاجه و تأثير الميكروبيولوجي على الانسان والامراض اللي بيسببها و الانزيمات و السموم الميكروبيه و الهرمونات النباتيه  و شغلها موجود برضه في التحاليل و شركات الادويه و شركات الكيماويات  
•قسم جيولوجيا : شغله موجود في شركات البترول و شركات المياه و جهاز شئون البيئه و قطاع الاثارو ممكن يشتغل اوبيريشن (عمليات يعني ) في المكتب وده اللي بيعمل الخرايط مش الجغرافيه لأ خرايط تانيه هتعرفوها قدام شويه 😃 و مش كده بس ده كمان بيدرس كيميا و بيشتغل بيها و شغل الكيميا بقي في معامل التحاليل و شركات الادويه و الاسمده و ..... قولناها كتير بقا نقول تاني؟😂
•قسم حيوان : بتدرس فيه البيولوجي بتاع الحيوان و الفيسيولوجي والفقاريات واللافقاريات وعلم الوراثه والانسجه و الاجنه و المناعه
وشغله في معامل التحاليل و شركات الادويه برضه و شركات كتير زي ما قولنا الكيميائين بيشتغلوا في كل حته 💪😎
•قسم نبات : بتدرس فيه البيولوجي بتاع النبات و شويه فيسيولوجي للنبات و تصنيفاته و العوامل البيئيه اللي بتأثر فيه و التلوث و الانزيمات و الطحالب و تشريح النبات و شويه في علم الوراثه و شغله بقي في معامل الابحاث و التحاليل و شركات الادويه
•قسم حشرات : بتدرء في القسم ده البيولوجي بتاع الحشرات و تشريح انسجه الحشرات و المورفولوجي بتاع الحشرات و تصنيفات و تقسيمات الحشرات و علم بيئه الحشرات وعلم الطفيليات والوبائيات والتحاليل الطفيليه و الفيسيولوجي بتاع الحشرات ومكافحه الافات والسيطره عليها و المناعه و الميكروبيولوجي و الباثولوجي للحشرات و علم السموم
وشغله في معامل البحوث الزراعيه و معامل التحاليل و الشركات زي الادويه
•قسم كيميا : الكيميا بقي انتو عارفنها عضويه و حراريه و كهربيه و تحليليه و حاجات كتييييييييييير هتدرسوا كيميا لحد ما تحلموا بيها و انتو نايمين 😃 و شغل القسم ده في كل شركات مصر مفيش شركه من غير كيميائي من ادويه و اسمده و مستحضرات التجميل و الشيبسي و البيبسي و كل حاجه لازم يدخل  فيها كيميائي و طبعا ممكن يشتغل في معامل التحاليل
•قسم بحار : بيدرس علوم البحار بكل تفاصيها وبيأهلك انك تشتغل في مجال البحوث الاساسيه والتطبيقه في مجال علوم البحار وبتدرس فيه الكوارث الطبيعيه البحريه والظواهر المختلفه وبتدرس الشواطيء المرجانيه والرسوبيات وقاع البحر وازاي تدور عن مصادر للثروه المعدنيه
وعندك اكتر من مجال ومكان تشتغل فيه بعد ما تتخرج زي المحميات الطبيعيه وشركات البترول ومراكز الغوص وشركات أعالي البحار و محطات المياه والتحليه ومصانع الأدويه والمنظفات والمزارع السمكيه وشركات تصدير المنتجات البحريه وشركات تصنيع الأسماك والمركز القومي للبحوث وزارة شئون البيئه
•قسم جيوفيزيا : الجيوفيزيا هي تطبيق لقوانين الفيزيا على الجيولوجيا اللي هي علوم الارض يعني و هي بقا في شغله تعتبر تنقيب اولي قبل ما احفر عشان اطلع الحاجه اللي انا عاوزها من تحت الارض ( بترول - مياه - معادن - ......... )
بتشتغل شغل الجيوفيزيكس اللي هي زي الاستجابه الكهربيه او المغناطيسيه للارض و استخدم موجات السزميك و الجرافيتي عشان اعرف فين المكان الغريب اللي في استجابه مختلفه عن اللي حوليه فاكيد المكان ده هو اللي فيه الحاجه الغريبه اللي انا عاوزها ( البترول و غيره )
وطبعا مطلوب في الشغل في شركات البترول و شركات المياه و تبع الاثار كمان بس البترول هو الاكثر شيوعا
•قسم بيوفيزياء : ودا هتلاقيه في جامعه القاهره وبيستوعب حوالي ٥٠ طالب والبيوفيزيا هي علم قائم بذاته وتم اعتماد أربع تخصصات رئيسية وهى : البيوفيزياء الجزيئية و البيوفيزياء الطبية و البيوفيزياء النظريه و البيوفيزياء البيئية..
وقدامك اماكن كتير ممكن خريج قسم بيوفيزياء يشتغل فيها زى المعهد القومى للأورام و مستشفى القصر العينى والمعهد القومى لعلوم الليزر والمركز القومى للبحوث و معهد بحوث امراض العيون والوكالة الدولية للطاقة الذرية و مركز البحوث النووية ..
وممكن كمان تشتغل اخصائى التصوير الإشعاعى و العلاج الإشعاعى فى كذا مكان زى مستشفى القوات المسلحة ومستشفى 57357 و كايروسكان و ألفاسكان و اى مستشفى تانى و كمان ممكن تشتغل فى الطاقة النووية و الذرية.
لو انت مكمل قراءة لحد دلوقتي فأنا حابب اقولك نقطة مهمه جدا وهي أن كلية علوم من امتع الكليات اللي ممكن تدخلها وبتعلمك حاجات كتير كويسة بتعلمك تركز في كل حاجه حواليك وبتعلمك الإصرار والصبر زي البوست دا بالظبط كدا 😉
نكمل؟
نكمل.🤝😇
جينا لنقطة مهمه جدا واغلبكم مستنيها وهي التخصصات الخاصة اللي بيدفعلها فلوس أو تحديدا قسم البايوتكنولوجي🔥
بص يا سيدي
•قسم بيوتكنولوجي: قسم جديد و مش موجود في اي جامعه حكوميه في مصر غير القاهره وهتلاقيه في الجامعات الخاصه ك كلية زي (جامعة مصر للعلوم والتكنولوجيا)
فرص شغله موجوده في الشركات زي الادويه والشركات الصناعيه زي الالبان و المأكولات وكذلك في المستشفيات لعلاج الامراض الوراثيه وبرضه عندك استخدام تطبيقات البيوتكنولوجي في الصناعه و الزراعه و التحاليل الطبيه و في تطبيقات كتير موجوده..
طبعا القسم خاص المصاريف بتاعته 9 آلاف جنيه تقريباً في السنه + 10% زياده كل سنه و لما تنسيقك يجيب علوم و عاوز تخش القسم ده و انت بتقدم بتقول للشئون و انت بتسلمهم ورق التقديم انك عاوز تخشه لأنك هتخشه من سنه اولي علي طول و بيبقي فيه انترفيو بسيط كده
خلصنا الاقسام الخاصه؟
تؤتؤ فيه اقسام تانيه كويسة جدا زي
•قسم علوم البترول : ودا هتلاقيه في علوم اسكندريه والسويس وعين شمس
ودا مش مهندس بترول زي ما الناس فكره لأ بيبقى جيولوجي برضه و الفرق بينه و بين اقسام جيولوجيا العاديه الموجوده في الكليه ان قسم علوم بترول متخصص في دراسه علوم البترول بس لكن الجيولوجيا بترول و مياه و معادن
وفيه شركات زي شركه شلمبر جير ( من اكبر شركات السيرفيس كومباني ) الشركه المفروض انها بترعاك و بتوفرلك رحلات (بس الرحلات برضه بيطلعها اقسام جيولوجيا) و بتوفرلك فرص تدريب كتير (لأن اقسام جيولوجيا العاديه بتوفر فرص تدريب بس في تالته بس) ده توفير منهم لكن لو اي حد يقدر يجيب فرص تدريب لنفسه في اي وقت عادي و الشركه كمان بتوفر فرص شغل للاوائل
والمصاريف بتاعته 8 آلاف جنيه في السنه او ١٦ الاف بيختلف من جامعه التانيه عموما + 10% زياده كل سنه
• IMAK ميكرو وكيميا من ناحيه صناعيه
ودمتاح لعلمي علوم فقط
• Sim بتدرس سوفت وير والبرمجه
ملحوظة مهمه 🔥
فيه كليه اسمها علوم بنات مش موجودة غير في عين شمس واكييد واضح انها للبنات وبس عشان الفيمينست وكداهو😉😂
بس فيها حاجه كمان مختلفه عن الباقيين غير انها للبنات بس وان فيها قسم مش موجود الا في علوم بنات الي هو قسم التغذية وهو قسم مزدوج كيميا حيوي وتغذية وقسم كيميا حيوي ده من اعلي الاقسام في علوم وبتطلع منه اخصائي تغذيه
اخيرا والحمدلله وصلنا للنهاية
وزي ما انتو شوفتوا الكليه اد ايه واسعه ومتشعبه وكل قسم ليه فرص شغل واتنين وتلاته
والكلية مهيش رجل المستحيل وكلام الاحباط الي حواليها ده ملوش اي لزمة لان لا هتلاقي كليه سهله ولا هتلاقي كليه وبيططبوا عليك فيها ودا ساري ع جميع الكليات
===================
#كلية_علاج_طبيعي
◾دايما أول ما بتسمع علاج طبيعي بتتقفل كده لإن أول صورة بتيجي في دماغك هو إن علاج طبيعي = massage  مع إن في أقسام تانية كتير خلونا نبدء ونتعرف عليهم وعلى الكلية بشكل أوضح 👌
《علاج طبيعى 》
 نتمنى متزهقوش عمومًا 😴
◾كلية العلاج الطبيعى هى كلية طبية بتتقسم ل :
- 5 سنين دراسة
- سنة إمتياز
- سنتين تكليف
◾خريجين الكلية ليهم نقابة اسمها نقابة العلاج الطبيعى
◾الكلية دي في4 جامعات حكومية بس هما القاهرة وبنى سويف وكفر الشيخ وجنوب الوادي والسنة دي هتفتح كلية علاج طبيعي في جامعة بنها 👌
- القاهرة وبني سويف بيتوزع عليهم الطلبة ال في وجه قبلي وكفر الشيخ الطلبة ال في وجه بحري وغالباً هتبقى معاها بنها
◾طيب كل ده كلام عادى جدًا المهم دلوقتي أنا هعمل إيه في الكلية دي؟
- وعشان تعرف هتعمل إيه في الكلية دي لازم نفهم الأول يعنى إيه علاج طبيعى، وإيه وظيفته🤔
◾أول لما بتحصل مشكلة في جسم الإنسان ناس كتير بتتجه للعلاج الكيميائي رغم إن الجسم بيبقى محتاج العلاج الطبيعي من أول الإصابات الخفيفة لحد أكبر مشكلة بتمنع الإنسان من الحركة ووقتها بيلجأوا للمعالج الطبيعي
- ده غير الأضرار ال بتحصل نتيجه مشاكل 《الجهاز العصبى، المفاصل، العضلات، المشاكل ال بعد الجراحة، والاصابات الرياضية وكمان المشاكل ال بتحصل نتيجة إن السن بيتقدم زى خشونة الركبة والليلة دي.》
◾أكيد أخدت بالك كلمة مشاكل اتكررت كام مرة✍
أنت ال هتحل كل المشاكل دي بقى كلها، دورك إنك تحاول قدر المستطاع تحل المشاكل دي وترجع حركة العظام نفسها لطبيعتها 🤸‍♂️
◾وعشان تقدر تعمل ده فانتَ بتدرس أول سنتين مواد أساسية زى الأناتومى《 هو علم التشريح 》وعلم الانسجة وكيمياء حيوية وتمارين علاجية وهكذا
◾تانى سنتين بتبدأ تاخد مواد أو أقسام علمية
بتبدأ تدخل يعني في صميم المجال وتتعرف على مواد من أقسام مختلفة
زي《 قسم الباطنة والنسا وإصابات ملاعب وفيه حروق وقلب وباطنة وأعصاب وأطفال.》👨‍⚕️👩‍⚕️
- بس كل ده طبعًا من وجهة نظر العلاج الطبيعى والجزء الخاص بشغلك مش بتدرس تفاصيل كل ده زى بتاع بشري
◾وبتدرس التخصصات والاقسام كلها بس مش معنى كده إنك بتتخصص في حاجة فيهم، انت بتاخدهم عشان تتعلم وتبقي مجمع كله ومش بتتخصص غير لو حبيت تكمل دراسات عليا فساعتها بتختار قسم واحد بس تحضر فيه دراستك وماجستير ودكتوراه وكده.📚
◾وأكيد الدراسة بتكون بالانجليزي بس انجليزي علمي يعني مصطلحات ومفاهيم والكلية طبعا بتجمع بين الجزء النظري والعملي 🤓
◾الدراسة بتعتمد بشكل أكبر على الجزء العملي يعني ال بتدرسه في محاضرات بتطبق عليه في سكاشن وبتبدء ممارسة فعلية من سنة تانية وطول مدة الدراسة أنت بتجرب وبتمارس بنفسك وده يمكن بيميز الكلية دي عن غيرها من الكليات🏛
◾ومن أول تالتة لو أخدت الموضوع في الكلية جد واجتهدت ممكن تنزل تشتغل وتدرب في مراكز علاج طبيعي أو مستشفيات وبتبقي أكتر الحالات ال بتيجي ألم الضهر وشلل الأطفال و خشونة الركبة
◾كده الحمد لله خلصنا ال4 سنين كلية وداخلين على الإمتياز أهو وقربنا نتخرج😀
◾سنة الامتياز دي عبارة عن ايه؟
- الامتياز بيكون 12 شهر بتلف فيها على الرواندات حسب ما بيوزعوك يعني كل شهرين بتاخد راوند في قسم معين، يعنى بتاخد عظام شهرين وبعدين نسا شهرين وهكذا علي كل الاقسام وبتيجي في آخر شهرين بيبقي راوند بتختار هتاخد فيه إيه بنفسك على حسب أكتر قسم انت حابه يعني لو حابب مثلًا أعصاب فبتختاره 🙏
◾الإمتياز بيكون عادة حسب موقعك الجغرافي بس كمان تقدر تقرر بنفسك تروح فين سواء القاهرة أو الأقاليم وممكن لو تعرف دكتور شاطر أو مركز علاجي معين كمان تروح تاخد الإمتياز من عنده ✅
◾خلصنا 4 سنين الدراسة وسنة الامتياز  ها إيه كمان؟!
- فيه كمان سنتين تكليف
- وإيه الفرق بين الامتياز والتكليف⁉️
- الفرق إنك في امتياز بتتعلم وبتتدرب كأنك في الكلية لسه  بس بتتعلم بشكل عملي مش نظري بس في التكليف بتبقي زي دكتور حر بيشتغل بنفسه من غير ما يكون حد لسه بيعلمك ويدربك.😅
◾التكليف في معظم الأحيان بيعتمد على تقديراتك وعشان تضمن إن يجيلك تكليف في مكان قريب بالنسبالك ومريح ذاكر كويس😎
◾الموضوع بيتم من خلال التوزيع الجغرافي وفيه استئناءات بتحصل طبعًا منها مثلًا استثاءات للبنات المتزوجة
◾خلصت تكليف ؟!
- الحمد لله دلوقت انت بعد ما بتخلص التكليف والامتياز بيبقي اسمك ممارس عام 🥣
- وبعد ما يبقى معاك ماجيستير ودكتوراه في التخصص ال انت بتختار تعمل فيه دراسات عليا، بتكون أخصائى علاج طبيعي ومن حقك تفتح مركز العلاج الطبيعي الخاص بيك
◾طبيعة الشغل إنه بيتحولك الحالة من دكتور بشري عظام أو أعصاب و انت بتعمل التشخيص من جديد عشان لو التشخيص غلط المريض هيضيع بعد أما نوصل للتشخيص السليم، وبتحط الخطة العلاجية للمريض 📋
◾طيب سؤال بيلح على كتير منكم هل الكلية صعبة؟
- مفيش كلية سهلة وكلية صعبة كله فيه الصعب والسهل ولو انت عاوز تثبت نفسك متحاولش تدور على السهولة أو الصعوبة دور على ال هتلاقي فيه نفسك واجتهد وأسعى دايما للأفضل👌
◾وبلاش كل تفكيرك يكون إن تنسيقك رماك في الكلية ودي ال موجودة قدامك وخلاص بشكل عام مجال العلاج الطبيعى يعتبر جديد ومطلوب جدًا غير إن عدد خريجينه قليل نسبيًا بسبب قلة كليات العلاج الطبيعى في مصر، غير إنه مطلوب في الدول العربية وفي أوروبا بشكل كبير والعلاج الطبيعي عموما آمن أكتر لأنه ملهوش side effects لذلك ناس كتير بتفضله😀
◾ بشكل عام بتطلع من الكلية دي دكتور واخصائي علاج طبيعي
- ممكن تشتغل في اي مستشفي او تفتح عيادة ليك او تشتغل في عيادة مع حد تاني، أو تشتغل في الأعمال الاستشارية في مجال العلاج الطبيعي أو وحدات علاج الروماتيزم و المراكز العلاجية طبعا
- ده غير مجال الأبحاث والسلك التدرسي
◾مجال العلاج الطبيعي مش مفاصل وتغذية وأعصاب بس، في نسا وجلدية.
-والتخصص الواحد جواه أفكار إبداعية كتير لأنه كمجال مُستحدَث ومُطوَر على طول.
- الشغل بعد الكلية موجود وأكتره بيبقى شغل علاج طبيعي للعظام والأطفال والأعصاب دول اكتر حاجات مطلوبة 🤝
◾نصيحة أخيرة إذا ربنا قدرلكم الكلية دى ف زمايلكم ال أكبر منكم بيقولولكم عندكم مادة اسمها أناتومى《 Anatomy 》
مهمة جدًا ذاكروها كويس واتأسسوا فيها صح عشان هتنفعكم بعد كده في شغلكم 👀
بالتوفيق يا دكاترة 🌸
=====================
#كلية_الصيدلة
◾خلال عمرك كله أكيد مرت عليك خناقة قوية جدا وهي هل الصيدلي بياع ولالا؟🤔
- تعالوا نشوف يعني إيه صيدلي ويعني إيه كلية صيدلة وهنسيبلكم انتوا القرار يلا بينا 🤓
◾لو حابب تدرس تكوين الأدوية وازاي تقدر تتعامل مع كل حالة مرضية بنوع علاج مختلف يبقى ده مكانك👌
◾ ناس كتير هتقولك إنت فاكر يعني إنك أنت ال هتخترع الدوا ده إنت يدوب بس بتعرف المكونات
- طب السؤال هنا حضرتك ما أنا لما هعرف المكونات وهعرف إيه ال بينفع مع كل حالة مش ممكن أطور دوا يزيد فعالية تأثيره؟
◾كلية صيدلة بتجمع بين 3 كليات في كلية واحدة لأنك فيها بتدرس مواد من علوم زي 《الكيميا العضوية والغير عضوية والتحليلية والفيزيا وغيرهم》
وبتدرس كمان مواد من طب زي 《أناتومي وهيستولوجي وفيسيولوجي》
ده غير مواد كلية صيدلة نفسها اصلا
◾كلية صيدلة في منها أنواع كتير بس المتعارف عليه في مصر هي الصيدلة ال general ومؤخرا ظهر قسم جديد في مصر هو ال clinical
◾طيّب إيه قسم clinical ده ؟ 👀
- كلينيكال :💉
يُعتبر قسم خاص في الكلية بيتدفعله مصاريف كل سنة والمصاريف بتختلف من جامعة لجامعة ومن سنة لسنة
- بالنسبة للدراسة فأنت في القسم ده بتدرس مواد قسم جينيرال عادي + مواد من طب متقسمة على 3 سنين لمواد جينيرال + 2 سنة مواد من طب
- أما الشغل بقى ففي الأغلب بيبقى في مستشفيات والصيدلي الكلينيكال كمان بيدخل غرفة العمليات مع الدكتور البشري بحيث إن الدكتور البشري يشخص الحالة والصيدلي الكلينيكال يكتب الدواء ويتابع حالة المريض ويحدد الجرعات كمان 🏣
- بتدخلها بمجموع صيدلة العادي وبعدها بتبدء تحدد إنك عايز قسم كلينيكال وده بردو بيتوقف على الجامعة هل ليها شروط ومعايير مختلفة في قبول طلاب القسم ده ولالا
《ده بتعرفه لما بتروح تقدم في الكلية نفسها》🏛
◾مواد كلية صيدلة : 💊
- أول سنتين بتدرس مواد عامة وأساسيات كمان بتدرس مواد ممكن تساعدك في إدارة صيدلية او شركة أدوية كمان لو فكرت تفتح بيزنيس خاص بيك بجانب أساسيات في الكيمياء وغيرها من المواد
- في سنة 3 بتبدء دراسة صيدلة حقيقي فبتبدء تجرب الأدوية والجرعات وفاعليتها على عينات حية وحقيقية زي الضفادع والفئران🐸
◾طب نظام الدراسة بيبقى عامل إزاي؟!🤔
- نظام الدراسة في صيدلة زي أغلب كليات مصر للاسف مش بتديك المعلومات الكافية ال تقدر تواجه بيها سوق العمل فيما بعد و طبعا بتنقسم لجانب عملي وجانب نظري والجانب النظري محتاج فهم أكيد بس محتاج حفظ بردو 👇
- لذلك مَتتخيلش إنك هتدخل تستريح في صيدلة، الكلية من أكتر الكليات ال محتاجة مجهود .
- انتَ بتمتحن كتير على كل حاجة كويزات على النظري العملي وشيتات وشفوي وامتحانات بتستمر لغاية الفاينال، طول السنة امتحانات
- الفاينال هوَّ الأهم وعليه أكبر نسبة، إنما انتَ كل امتحان بتمتحنه بيكون عليه نسبة من التقدير الكلي.
◾صيدلة أساسها العملي لذلك هي كلية عملية من الدرجة الأولى، بتتعامل فيها مع معامل وعينات وأدوية ولازم تحضرهم عشان تقدر تفهم ده غير إن حضورك عليه درجات
كمان امتحانات الشفوي مهمة لأن الدكتور لازم يتأكد إنك بتعرف تتكلم وتتعامل مع الحالة لإن شغلك كله هيبقى مباشر مع المرضى
《عشان كده بنقولك ذاكر وأحضر السكاشن عشان تعرف تدينا دواء صح لما نتعب🙏》
◾المواد ال بتدرسها هتفيدك كأساسيات لشغلك بعد كده، لكن لوحدها مش كفاية زي ما قولنا فوق بنقولك تاني دور واقرأ وابحث عن مصادر بنفسك👍
◾بعد التخرج انتَ متاح ليك شغل كتير مش بس تقف في صيدلية لا انتَ ممكن كمان تشتغل في شركة أدوية سواء كان في الرقابة على الدواء أو كمندوب مبيعات للدواء و وممكن تشتغل في مصنع أدوية أو في مستشفى
- كمان الشغل في مجال التدريس في الجامعة متاح أكيد وأنت وشطارتك
- لو حبيت تشتغل شغل كلينيكال كمان تقدر تعمل دبلومة بعد التخرج
◾يُقال إنه ممكن من صيدلة تشتغل شغل بايوتيكنولوجي باعتبارهم في نفس محيط المجال بس الحقيقة إحنا معندناش معلومة أكيدة عن ده بس ممكن تبحث عنها لو حابب 📖
◾ممكن أي حد يشتغل في صيدلية ويتعامل مع مرضى ويديك الدواء ال الدكتور بيكتبهولك في الروشتة بس مش أي حد يقدر يعرف الدوا ده بيشتغل جوا جسمك ازاي ولا ممكن تبقى خطورته وال side effects بتاعته إيه
وإيه الأدوية ال مينفعش تاخدهم في نفس الوقت كل دي معلومات ميعرفهاش غير الصيدلي👨‍⚕️👩‍⚕️
◾صيدلة كلية ليها أهميتها ومحدش يقدر يستهين بيها لو بتحبها ومقتنع بدراستها فهي بترحب بيك جدا وبتتمنالك التوفيق والتقدم🌸
ها دلوقتي تقدر تقولنا الصيدلي بياع ولالا؟👀
===================
#كلية_طب_الأسنان.
أسنان من الكليات الممتعة ف دراستها وشغلها، وعشان كدا عدد مش قليل أبدا بيدخلها وهو حاببها فعلا، حتى لو جايب مجموع طب بشري.
ف خلينا نأكد ع فكرة إن الكلية ال إنت هتدخلها أيا كان مجموعها، لازم يكون ليك شغف واهتمام تجاهها، مش داخلها بهدف التفاخر أو عشان حد عايزك تدخل الكلية الفلانية 😅💔.
نبدأ مع طب الأسنان ونعرف عن دراستها، والعملي وكمان نظام الشغل بعد التخرج إن شاء الله 👏.
📍نظام الدراسة:
- أسنان 5 سنين + سنة امتياز في كل الجامعات بس تقسيمهم بيختلف..
بمعنى أن في جامعات:
1️⃣ بتعتبر أول سنة اعدادي وبيدرسوا فيها مواد من علوم زي كيميا وفيزيا وحيوان وأوقات تشريح ضفادع (زي اسكندرية وطنطا والمنصورة وسينا)
2️⃣ من أول سنة بيدرسوا مواد أسنان عادي من غير مواد علوم.
- وأيا كان تصنيف جامعتك من الاتنين، ف بتاخدوا مادة او اتنين من طب بشري بشكل بسيط مش بتوسع، زي التشريح، ولكنه خاص بالأسنان ف مادة اسمها "Dental Anatomy" ودي بتدرس فيها بالتفصيل تركيب كل سِنَّة.
-في السنين اللي بعد كده بتكون دراستك متخصصة أكتر ممكن تدرس مواد من بشري بس المعظم من أسنان زي في تانية وتالتة، وفي رابعة وخامسة بتدرس الجراحة والتقويم والجذور واللثة.
📍العملي:
- العملي معاك في السكاشن من أول سنة:
▪️لو عندك اعدادي بيكون تجارب فيزيا وكيميا وتشريح ضفادع.
▪️عملي أسنان في أول سنة شغل (أو لعب🥳) بالشمع وتسييح وتعمل مودلز للسنان كلها بمقاساتها وحاجة لعب ومتعة للصبح يعني 🥳
⚠️بس ممكن يبوظ منك ف الآخر وتعيده تاني 🤭😂💔
- تاني وتالت سنة العملي فيها بأدوات تانية بتعمل تركيبات وشكل الفك كله بأيدك.
- من رابع سنة بتبدأ تشتغل مع الpatients عملي في الكلية وتنزل عيادات، تعملهم حشو وتركيبات وغيره..
-بعد ما بتخلص بيكون عندك امتياز بتشتغل فيه ف الكلية، وبعد كدا ممكن تبدأ شغل خاص بيك في عيادات مثلاً تحت رقابة وزارة الصحة.
📍الشغل بعد التخرج:
بعد ما بتتخرج تقدر تشتغل ف عيادات طب الأسنان المتعارف عليها، من خلع وتركيب وغيره، بس في مجالات متوسعة أكتر تقدر تشتغل فيها، زي:
- ممكن تتخصص في مجال من مجالات طب الأسنان زي: جراحة الوجة والفكين، طب أسنان الأطفال وتقويم الأسنان والفكين وغيره.. (سواء هتشتغل ف عيادة مع دكتور تاني، أو هتفتح عيادتك الخاصة)
⬅️ عن طريق تحضير ماجستير وتكمل دراسات عليا.
- تقدر تتخصص في تجميل الفم والأسنان (التبييض والتركيب وغيره)
⬅️ عن طريق إنك بتاخد كورسات تجميل وتشتغل ف مراكز تجميل الأسنان dental care centers.
- عيادات طب الاسنان للأطفال بما إنهم بيخافوا جدا فبتكون دي عيادات مخصصة ليهم بيكون فيها حاجات بتجذب الأطفال زي شاشات عرض كارتون أو تشجعهم بهدايا أو بتستخدم معجون سنان بنكهات، أدواتك بتبقي مخصصة للأطفال بأشكال متخوفهمش. (عشان دكاترة الأسنان بيخوِّفوا معروفة 😂🙊)
وزي ما دراسة طب الأسنان ممتعة ف أنت شغلك فيها ممتع جدا كمان وإنت بتشوف نتيجة تعبك، وإن المريض بتاعك مبسوط بشغلك معاه وبقت أسنانه مريحاه وبيبتسم وهي مستريح 😁
======================
#كلية_حاسبات_ومعلومات
◾ دايما لما بتبقى قاعد في البيت وسط عيلتك ماسك التليفون ومش مركز معاهم بيبتدوا يتعصبوا منك ويقولولك سيب الزفت من إيدك😂
- طب إيه رأيك يبقى ليك مبرر تمسكه ولو حد قالك سيبه من إيدك ترد بكل ثقة وتقول أنا بشتغل😎
《حاسبات ومعلومات》
◾حاسبات ومعلومات كلية هندسية بتختص أكتر بالفرع الإلكتروني من حياتنا ولازم عشان تدخلها تبقى متأكد 100% إنك بتحب التصميم والبرمجة
◾لازم تبقى مهتم بالمواقع وال platforms المختلفة زي فيس بوك وانستجرام وجوجل مثلا
- طب ليه لازم تبقى مهتم؟
- ببساطة لأنك مستقبلاً أنت ال هتصمم مواقع زي دي فلازم تعرف المواقع دي بتتعمل إزاي وبتُستخدم إزاي
《أنت أملنا ركز وذاكر عشان مارك ميقولش علينا حاجة》
◾كلية بتخدم المجتمع بشكل كبير وبتسهل حياتنا جدا بشكل يومي ومش بس كده دي بتساعدك توصل لمرحلة من الرفاهية زي إنك تبقى قاعد في البيت وعارف أخبار العالم كله مجرد ما تفتح موقع أو أبليكيشن
◾ نيجي بقى لطبيعة الكلية و دراستها،
الكلية أربع سنين ، بتدرس فيها مباديء البرمجة والكمبيوتر و بتتعرف على ال Algorithm أو الخوارزميات وهي طريقة الحل وليه اسمها كده؟
- نسبة للخوارزمي عالم الرياضيات المعروف
◾الكلية مهمة أكيد وبقت من أحدث المجالات يعني
انت لو دخلت على《 جوجل》 وكتبت أفضل شغل في العالم دايما هتلاقي المبرمج مكتسح متعرفش عشان هما كدة فعلا ولا عشان هم الي بيعملو المواقع دي :'D
◾الكلية زي أي كلية في مصر لو اعتمدت عليها لوحدها مش هتعرف تواجه الحياة العملية بعد كده لازم تجتهد مع نفسك وتسعى إنك تتطور بما يعادل سوق العمل ومتعتمدش على أساسيات الكلية وبس
والمجال ده في كورسات مجانية كتير أشهرهم هيبقوا موجودين على يوديمي وكورسيرا لأنه واسع وممكن تتعلم لغات جديدة وتتقنها زي الjava و الp.h.p و غيره.
◾نبدأ نتكلم عن اقسام الكلية
اولا فى اقسام بتكون موجوده فى كل الجامعات الموجوده فيها الكليه فى مصر زى مثلا :    
《أ 》- اول حاجه قسم Computer Sciences الي معروف ب CS :
القسم ده من اجمل الاقسام في كلية حاسبات و معلومات
و ده لأنك هتاخد فيه لغات برمجة كتير من الموجودة في الكمبيوتر يعني مثلاً زي《 السي و السي بلس و السي بلس بلس و الاسيمبلي و السي شارب وغيره 》
- القسم ده علم الرياضة فيه مهم جدا فلو انت شاطر في الرياضة ادخل من غير تردد واعمل حسابك هتغرق في الأكواد "))
- المواد بتاعته بتختلف من جامعة لجامعة , لكن عموماً المواد  بتعلمك ازاي تترجم لغات البرامج و ازاي تدرس البنية التحتية للبرمجيات , لانك هتبقى مصمم برمجيات
كذلك بتاخد مقتطفات عن برمجة الشبكات ومواقع الانترنت
لكن دراستك في القسم ده بتنصب على برمجة اكتر
وطبعاً لقبك في مصر بيبقى مبرمج او مطور و رسمياً اسمك اخصائي برمجة
 بره مصر : مهندس برمجيات
المستقبل في القسم ده مشرق جداً , و بره المجال ده بيبقى له اهتمام اكبر و مجالات شغله اكتر بكتير من مصر ومحتاجة واحد ذكي وقادر يطور نفسه أول بأول
《ب》- تاني قسم هو نظم المعلومات Information Systems Department = IS :
قسم نظم المعلومات قسم كويس جدا وطبعاً نظم المعلومات بتدرس برمجة و شوية من شبكات الانترنت و الاتصالات و شوية من مواد التسويق وادارة الاعمال وده أكيد هيفيدك لو حبيت تشتغل في حاجة بعيداً عن البرمجة شوية
- طبعاً البرمجة هنا نقصد بيها برمجة قواعد البيانات S.Q.L
إلا انه برضه بتاخد شوية لغات من البرمجة مش كلها
بس دراسته بتقوم على قواعد البيانات
- المواد باختصار بتتكلم عن التجارة الالكترونية , وبرمجة قواعد البيانات و هندسة المعلومات , و كمان بتتكلم عن نظم المعلومات الادارية و الجغرافية , و تطوير العمل المكتبي
 فيما معناه ازاي تتعلم تصمم برامج لإدارة الشركات و البنوك  و ازاي تخزن بيانات الشركة كلها على برنامج واحد او على موقع انترنت واحد
لقبك جوه مصر بيبقي : اخصائي نظم او مطور او مبرمج
بره مصر بقي: مهندس معلومات , او مهندس معلوماتية
◾كل الخريجين من القسم ده بيشتغلوا في البنوك و في الشركات الكبيرة , بل ان بعض كليات الحاسبات بتهتم بالقسم ده اكتر من غيره, لان الشغل هنا بيبقى احسن كمان ومعظم بيانات العملاء في اي شركة القسم ده هو الي بينظمها.
وشغله كله بيانات يعني حاجة كدة زي السجل المدني اعوذ بالله ايه التشبيه السيء ده ما علينا ندخل في اخر قسم :'D
《ت》- تالت وهو قسم تكنولوجيا المعلومات Information Technology Department = IT :
و هنا بتتعلم ازاي تبرمج شبكات الانترنت و تعرف ايه هو الانترنت اساساً و ليه اتعمل و مين عمله و تتعلم بردو ازاي تبرمج مواقع الانترنت الكبيرة و هتاخد لغات برمجة خاصة بالمجال ده زي《 الفي بي سكريبت و الروبي و البايثون و الجافا طبعاً 》
- دراسته ممتعة جداً
المواد بتتعلم فيها ازاي تبرمج الشبكات وازاي تبرمج مواقع الانترنت الكبيرة , و فيها مواد اتصالات بردو
وبيقي اسمك في مصر : مبرمج او مطور
بره مصر : بيبقي اسمك مهندس شبكات
القسم ده طبعاً موجود في اغلبية كليات الحاسبات و المعلومات بس مش كلها
◾اقسام بقى موجوده فى بعض الكليات زى :
1-قسم نظم الحاسبات
2-قسم الحسابات العلمية
3-قسم العلوم الأساسية
4-قسم نظم المعلومات الحيوية 《 بايو انفورماتيكس》
5-قسم نظم المعلومات الجغرافية
6-قسم هندسة البرمجيات
7-قسم بحوث العمليات ودعم اتخاذ القرار
8_قسم الوسائط المتعددة
◾عايزين نتكلم تحديداً عن قسم نظم المعلومات الحيوية
《بايوانفورماتيكس》:
- القسم ده تحديدا بيقبل من علمي علوم
يعنى ايه Bioinformatics معلوماتية حيوية ؟
*Bioinformatics = life science + computer science  *
يعنى ده مجال بيدمج بين علوم البايولوجى و علم الكمبيوتر
-طب هندرس فيه اى ؟
هتدرس فيه biology و organic chemistry و bio chemistry و molecular biology و احصا و فيزيا و رياضة و مواد computer science زى مقدمة فى علوم الحاسب و برمجة و هياكل بيانات و مواد تانية مش هتفهمها دلوقتى (دى المواد العامة ال هتاخدها فى السنين الاولى) بعد كدا بيتم الدمج .
Medical informatics
المعلوماتية الطبيه
الفرق باختصار هيا نوع الداتا اللى داخله لكل منهم
يعنى Medical informatics خاصة بcases لمرض الانسان يعنى يهمه صحة الانسان يعنى بيتعامل مع داتا تخص المريض و العلاج بتاعه و كدا
لكنbioinformatics بيهتم بالداتا الحيوية DNA او RNA او بروتين و كدا و بتعمل تطبيقات تساعد المجال الطبى بردو و الزراعى و الصناعى و البيئى بردو
و حاجات تانية كتير بس ده الفرق البسيط
◾في النهاية عايزين نقولك شوية حاجات ممكن تساعدك :
1 -اعتمد على نفسك مش على الجامعة
2- شركة مايكروسوفت بتعمل كل سنة مسابقة على مستوى كليات الحاسبات اللي في الجمهورية كلها المسابقة دي عبارة عن انهم بيختاروا افضل مشروع تخرج و اسمها Imagine Cup
الفايز فيها بيضمن شغله في الشركة نفسها
《المسابقة كانت بتتم السنين الفاتت بس منعرفش مؤخراً لسه قائمة ولالا》
3 - في مسابقة عالمية اسمها ACM لو كسبت وطلعت من اول 3 مراكز في المسابقة مع فريقك فأنت وفريقك هتتخطفوا من شركة جوجل لأنهم بيحبوا الناس المتميزة وغالبا هم ال بيكسبو المسابقة دي
《اختار تيمك كويس بقى》
4 - الدراسة في اي كلية حاسبات بتبقي بالإنجليزي ما عدا متطلبات الجامعة 《ال هي حقوق الانسان و جودة وغيرها》
5- ممكن طالب الحاسبات ياخد كورسات هاردوير , بس طبعاً مش بقوة مهندس الحاسبات
6- فقط عليك في الكلية دي انك تجتهد وتبحث عن مصادر لنفسك بنفسك وتدور على كورسات تفيدك في مجالك وده هيساعدك أكتر توصل لأهدافك
7- كل طريق في أوله صعب لذلك متزهقش بسرعة خلي نفسك طويل وشد حيلك وأبدء

=====================
#كلية_التمريض
◾ تمريض من مرّض يعني داوَى
تخيل لما مهنتك تبقى إنك بتداوي الناس وبتساعدهم يتخلصوا من الوجع ، يبقى تستاهل ولا متستاهلش؟😅
◾《كلية تمريض》
- كلية مهدور حقها وسط الكليات كلها
- ودايما المقارنه بينها وبين طب مش بتبقى عادلة😕 مع إن لو حسبنا الامور بشكل صح بعيد عن العادات والتقاليد والمجموع والتنسيق فهتلاقي إن كلية زي دي من غيرها مكنش هيبقى في مستشفي ولا دكاترة بردو😀
◾مبدأيا كده كلية تمريض موجودة في معظم المحافطات تقريبا زي  (القاهرة واسكندرية وطنطا والمنصورة وعين شمس و اسيوط والمنيا وبني سويف وسوهاج والفيوم وقناة السويس وغيره)
◾نظام الكلية بيخنلف من جامعة للتانيه يعني عندك جامعات ماشين بنظام الساعات المعتمده وال اكيد ليه مميزاته وعيوبه
-  وفيه كليات تانيه ماشيه زي اي كلام من غير النظام ده 🤓
◾وفي التنسيق غالبا كلية تمريض بتكون فوق ال90% لطلبة علمي علوم بس اكييد 👌
◾الكلية 5 سنين
 4 سنين دراسه وسنه امتياز
واغلبها بتبقي عمليه، يعني مطلوب منك حضور كل يوم 😣 وبتنزل المستشفي وبتشوف حالات وبتتعامل معاها
◾كلية تمريض المواد فيها بتتقسم قسمين : مواد تمريض 《يعني في صميم المجال》
و مواد غير تمريض 《يعني المواد الي معظم الكليات الطبيه بتاخدها》
◾فمواد تمريض في مادة اسمها أساسيات تمريض معاك كل سنة و لو شلتها بتشيل السنة كلها يا حلو حتى لو مش شايل مواد غيرها ودا من العيوب طبعا 👀
◾والمواد ال مش تبع تمريض بتبقي تقريبا زي مواد صيدله ال هما 《فارما وبايو》ومواد علاج طبيعي وطب بشري 《وفسيولوجي وتشريح وهستولوجي وميكرو》وغيرهم  كتير
◾وبتدرس طول الاربع سنين التخصصات والاقسام الي بتلاقيها بعد كده لما تيجي تشتغل 《زي باطنة وجراحه و نساء وتوليد وطوارئ وطب شرعي واطفال وعظام ورمد》🏥
◾خامس سنة بقا بتبقي سنة الامتياز مش بتكون دراسة دي بتكون تدريب عملي في المستشفي علي كل حاجة أخدتها في الكلية وبيقي ليك مرتب تحت اسم  "مكافأة"
◾وممكن تستلم الامتياز علي طول بعد ما النتيجه تظهر او ممكن تأجله وساعتها لو اجلته تقدر تشتغل في اي مستشفي خاصه والمرتب فيها بيقي حلو وجدا وطلبة الامتياز بيقوا مطلوبين 😎
◾وبعد الامتياز على طول هيبقي ليك تكليف او بيجيلك جواب تعيين بمعني اصح في المستشفيات الحكومي وده بيقي شغلك الاساسي بعد كده وبتتثبت في المستشفى كأخصائي تمريض وممكن تشتغل اخصائي في اي قسم مش شرط قسم معين 🙏
◾والكلية عموما بتتطلع منها بمؤهل عالي "بكالوريوس تمريض" والتعيين والتكليف بيجيلك كأخصائي تمريض مش ممرض بمعنى انك بتكون مشرف على طقم التمريض في قسم من أقسام المستشفى اي قسم بقى من ال كنت بتدرسهم طول الاربع سنين 《زي باطنة او جراحة او اطفال او اي حاجه》فانت بتبقي مشرف علي الطقم الممرضين الي في القسم ده الي بيبقوا متخرجين من معهد او مدرسه او اكاديميه تمريض
◾والفرق عموما بين التمريض والطب ✍
- إن الدكتور بيشخص الحالة وبيوصف العلاج بس اخصائي التمريض بيراجع العلاج والتشخيص وبيقي مسؤول عن كل طقم الممرضين عشان كده لازم يبقي فاهم في كل تفصيله في شغل الممرضين عشان لو فيه غلط يقدر يلحقه ويحاسب عليه الممرض😀
- يعني عندك مثال👀
 اخصائي التمريض في العمليات والتعقيم بيقي نوعين النوع الأول ده بيساعد الدكتور أثناء العملية ليس إلا والنوع التاني مسؤول عن تجهيز اوضه العمليات وتعقيمها وتعقيم الأدوات الي فيها وتجهيز المريض يعني بيتعب شوية في شغله
◾وزي ما قلنا ان التمريض بيدرس نفس مواد طب بس على اصغر شويه ومش بتعمق زي طب زي ما بالظبط بتوع طب بيدوسوا مواد تمريض على اصغر شويه 🤝
◾الكلية مستقبلها كويس جدًا لانك بتتخرج و تشتغل علي طول وتتثبت في شغل تبع الحكومه دا غير انك ممكن تنزل تشتغل او تتدرب وانت بتدرس عادي في اي مستشفي خاصه 💉
◾طيب نيجي لبعد التخرج وبعد التكليف
- هنلاقي ناس بتقف لحد هنا وتقولك انا شغال وبقبض وفيه ناس مش هتكتفي بكدا وهتكمل
والناس ال بتكمل ديه بيقي قدامها مليون سكه والتانيه تكمل فيها
◾أول حاجة هيا دبلومة تمريض عسكري وبتبقي بعد الامتياز وعباره عن ٦ شهور .. وبيقي قدامك عموما الجيش او الشرطه علي حسب ما تحب .. وبعدها بتشتغل في مستشفيات الجيش او الشرطه .. والموضوع ده حلو جدا وفلوسه حلوة "حاجة فُل أهي "✔
◾وفيه غير كده كمان دبلومة تحاليل طبيه وبعدها تقدر مع نفسك تفتح معمل تحاليل✔
◾ وعندك سكة الماجستير وبتبقي ٣ سنين  بتدرس فيه فرع من فروع التمريض وبيديك فرصه انك تدرس في الكلية  ويزودلك في مكانتك ومرتبك لو فكرت تسافر✔
◾ الزمالة : و دي دراسة بتعملها لما تخلص الكلية:
- زي زماله المعهد البريطاني وديه مرتباتها كويسة جدا💸
- وفيه زمالة مكافحة العدوى بتبقي مدتها 3 سنين وبعدها بتكون استشاري مكافحة عدوى وبيكون ليك وضعك في المستشفي و مرتب كويس كمان  
- وعندك زمالة المعلوماتية الصحية وبتبقي سنتين و بتتخرج منها أخصائي معلوماتية صحية و بيكون مجالك في الكمبيوتر
information technology جوه في المستشفي
- وفيه زمالة الإرواء قلبي و دي  بتتخرج منها أخصائي إرواء القلب ودا بيقي موجود في عمليات القلب المفتوح لما بيوقفوا القلب بيشغل جهاز القلب الصناعي .. ومهمته بتبقي تقيله لانه هو الي بيدي الاوامر ولازم يبقي عارف ازي يتعامل مع الجهاز كويس 🤝
- وفيه زمالات تانيه زي زماله الاطفال والتخدير
◾اخر مجال عندك هو الدبلومة
 ودي بتبقي مكلفه شويه واقل فايده من الحاجات التانيه ال قلنا عليها بس عموما الدبلومات زي مكافحه العدوي infection control  وبتبقي ٦ شهور او دبل
- او دبلومة الاداره او الجوده 🤔
◾وبشكل عام الكليه ديه من اكتر الكليات الي ليها مجالات شغل مش زي ما احنا فاكرين نهائي
《 وبإذن الله إذا أخدت قرارك ودخلت الكلية دي لازم تقدر قيمتك وقيمة العمل ال بتعمله و الموضوع مش سهل أوي ولا صعب مستحيل لا هو ممكن جدا بالمجهود والسعي》

===================
《كلية التكنولوجبا الحيوية / biotechnology 》
- كانت قسم في علوم وزراعة وحاسبات *ولسه موجوده كقسم* ولأهميتها تم فصلها واعتبارها كلية لوحدها🙏
《كلية التكنولوجبا الحيوية / biotechnology 》
◾ هي كلية بتدرس فيها الهندسة الوراثية وعلم الوراثة والجينات وبتدرس مجالات مختلفة زي :
《1》- Pharmaceutical biotechnology
المجال الطبي الدوائي💊
《2》- Agriculture biotechnology
المجال الزراعي 🌴
《3》- Marine biotechnology
فيما يخص علوم البحار 🐟
《4》- Industrial biotechnology
المجال الصناعي 🔩
《5》- Bioinformatics
مجال المعلوماتية الحيوية 💻
◾إيه الأماكن ال موجودة فيها ككلية وإيه كقسم عشان منتوهش ؟
- موجوده ككلية في جامعتي MUST و MSA و BUC و النيل
- في بينهم فرق واحد بس هو إن في MUST مفيش تخصص وبتدرس كل المجالات وتشتغل في كل المجالات فيما بعد 🤞
◾أما بقى بايوتيكنولوجي كأقسام موجوده في :
- كقسم في كلية زراعة في جامعة القاهرة
- قسم في كلية العلوم
- قسم في صيدلة الجامعة الألمانية GUC
◾بالنسبة للأقسام دي كلها فإيه مجالاتها ومختلفين عن بعض إزاي  ؟🤔
《1》- Industrial biotechnology
                     《المجال الصناعي》
- خريج الكلية بيشتغل ف مصانع الكيماويات
- بيشتغل في مصانع  ادوات التجميل وال makeup
- بيشتغل في مصانع الادوات المنزلية زي مثلا مساحيق الغسيل وانزيماتها  
- بيشتغل ف مصانع الغذاء اي مصنع اغذية زي شيبسي او بيبسي بتشتغل مراقب جودة بتشوف المنتج ده مطابق للمواصفات ولا لا وبالتالي الانتاج كله بيتوقف عليك
- بيتشغل ف ال Biomaterials و ال nanotechnology
بتشتغل ف صناعات الوقود الحفري
《2》- pharmaceutical biotechnology
                       《المجال الطبي الدوائي》
- بتشتغل ف شركات الادوية وصناعة الادوية زي المضادات الحيوية 💊
- بتشتغل في معامل ومراكز البحوث لاكتشاف ادوية للقضاء على الامراض
- بتدرس العلاج بالجينات   
- بتدرس الخلايا الجذعية وبتشتغل ف مراكز الابحاث او مراكز ومستشفيات العلاج بالخلايا الجذعية ف مصر والخارج
- بتشتغل ف الحقن المجهري واطفال الانابيب
- بتشتغل ف معامل DNA
- بتفتح معامل تحاليل طبية وتشتغل في معامل التحاليل
- بتشتغل ف الطب الشرعي والبحث الجنائي
《3》- Marine biotechnology
                          《علوم البحار》
بتدرس المجال ده ف الكلية بحيث تكون مؤهل لاستكشاف البحار واستخراج المواد الفعالة للمجال الطبي الدوائي 👌
《4》- Agriculture biotechnology
                      《المجال الزراعي》
- بتدرس كل ما يخص الهندسة الوراثية الزراعية والجينات
بنشتغل في تحسين المحاصيل الزراعية كجعلها مضادة للفيروسات او مياه البحار عشان تتسقي بمياه البحار
- كمان بتدرس المدة المتاحة ال ممكن تسيب فيها مثلا المحاصيل الزراعية في الشمس منغير ما يحصلها حاجة
- بتشتغل ف مراكز البحوث الزراعية 📑🌴
◾كده إحنا شرحنا مجالات وتخصصات كل فرع من فروع البايوتيكنولوجي ✔
◾بتتخرج من جامعة MSA و MUST و BUC و النيل حاصل على بكالريوس تكنولوجيا حيوية
◾قسم بايوتك كلية زراعة عين شمس حاصل على بكاليريوس زراعة
◾قسم بايوتك علوم حاصل على بكالريوس علوم
◾قسم بايوتيكنولوجي صيدلة حاصل على بكاليريوس صيدلة
◾بالنسبة للتنسيق فهو لسه لحد دلوقتي مفيش حاجة واضحة عنه بالنسبة للجامعات الحكومية أما بالنسبة للجامعات الخاصة فهو بيتحدد على حسب كل جامعة وحسب نسبة إقبال الطلبة وإستيعاب الجامعة🏛
- بالنسبة للمصروفات فهي بتختلف من سنة لسنة ومن جامعة لجامعة بس نقدر نقول إن المتوسط من 40 ألف ل 60 ألف
🚩جامعة MSA هي أعلى واحده يعني المتوسط بردو ما بين 90 ألف ل 100 ألف
⚠️خريجين الكلية دي تابعين لنقابة العلميين وكان في أخبار إن في نقابة للبايوتيكنولوجيست قريب بس منعرفش إذا كان الخبر ده حقيقي أو لا 🤓
◾الكلية مش صعبة ومش سهلة بس بتحتاج مذاكرة لأن تخصصاتها كتير وعلمية بحتة لذلك لازم تذاكر وتجتهد عشان توصل لكل أحلامك👌

====================

#كلية_زراعة
شباب الكليات والتنسيق العظيم .. ازيكوا ^^
نظرا ان مصر دولة زراعية بالدرجة الاولي🌳 .. ونظرا برضو اننا ماشين فيها بالبركة وعلى حسب كلام الناس والي بيقولوه وبس 🙂
ففيه كليات كتير بتضيع في وسط الشكليات دية .. وبيتبصلها على حسب المجموع وبس .. ومبيتعملش حساب اذا كان الكلية والمجال ده مهم وبينفع الناس ولا لا 🤦‍♀️
وكلية زراعة على رأس الكليات دي
هتلاقي ان اللي بيدخل الكليه دي وبيعرف اللى بيتدرس فيها نظرته بتتغير عنها تمام وبيعرف اد ايه هى مهمة❤
مبدأيا كده الكليه ٤ سنين … وممكن تدخلها من علمي بس .. وموجوده ف كتير من جامعات مصر في :
· زي القاهرة
·  وعين شمس
· والزقازيق
· واسيوط وغيرهم.
الكلية بتاخد من التلت مراحل عادي واحيانا بتاخد  لحد مجموع 80% وفيه سنين كتيرة بتبقي اقل كمان
ممكن لحد 75% مثلاً
ودي حاجة بتختلف من سنه للتانيه حسب التنسيق طبعاً
نيجي للاقسام بقي..
 ومش معني ان دي كليه زراعة ان انت هتبقي بتزرع بس يعني!  لأ خالص يعني
الكلية دي فيها 20 قسم … اه زمبؤلك كدا
يعني 20 تخصص تقدر تختار بينهم براحتك متخيل 😌
بس الاقسام ديه بتختلف من جامعة للتانيه … وفي جامعات كتيره مش هتلاقي فيها كل الاقسام دي،بس الي هنقول عليهم دول اشهر الاقسام الي ممكن تلاقيها في زراعة ف العموم يعني:
عندك بقا اقسام زي
1. قسم الإنتاج الحيوانى والسمكي.🐟
2. وقسم إنتاج الدواجن.
3. وقسم الغابات وأشجار خشبية.
4. وقسم أمراض النبات.
5. وقسم علوم الأراض.
6. وقسم المحاصيل والفواكة والخُضَر.🍊
7. وقسم البساتين.
8.  وقسم النبات الزراعى.
9.  وقسم الزهور ونباتات الزينة وتنسيق الحدائق.🌸
10.  وقسم الاقتصاد وإدارة الاعمال الزراعية.
11.  وقسم الاقتصاد المنزلي.
12.   وقسم علوم الأغذية وتقنية الألبان.🥛
13.  وقسم علم الحشرات التطبيقي.
14.  وقسم المجتمع الريفى.
15.  وقسم الإرشاد الزراعى.
16.   وقسم المايكرو بيولوجيا الزراعية.
17.  وقسم علوم الأراضي والمياه.
18.  وقسم الكيمياء الحيوية الزراعية.
19.  وقسم كيمياء وتقنية مبيدات الآفات.
20.  وقسم الوراثة.
والاقسام ديه كلها ممكن تدخلها لو كنت علمي علوم
اما لو علمي رياضه فبيبقي قدامك قسم هندسة زراعية .. وده هتدرس فيه طريقة تصميم شبكات الري الحديثة سواء بالرش أو بالتنقيط  للمزارع ولكن بتوسُّع طبعا..
القسم ده شغله يختلف شويه عن باقي اقسام الكلية لانك هتبقي مهندس🤓 ومطلوب في كل المزارع الكبيره .. وهتبقي المسئول مع فريق الصيانه وتصميم شبكات الري والابار .. وصيانه كل المعدات الزراعيه والتعديل عليها .. وبتتعاقد على المعدات الزراعيه والجرارات..  
 وانت ممكن تدخل أى قسم من الي اتكلمنا عليهم
ولكن دلوقتى فيه نظام اسمه المجالات بمعنى انك عشان تدخل قسم لازم تدرس المواد الى تبع مجال القسم الي انت هتدخله.
عندك مثلا : مجال وقايه النبات بيتكون من 3 اقسام او بمعنى اصح هتلاقي فيه تلت اقسام الي مرتبطين بمجال وقايه النبات وهما (قسم حشرات - وقسم مبيدات - وقسم امراض نبات )
يعني لو دخلت مثلا قسم حشرات يبقي لازم تدرس كورسات من القسمين التانيين الي هما مبيدات وامراض النبات وده بيفيد جدا فى الشغل علي فكره.
وعموما التخصص بيبدأ من سنة تالتة، يعني بتتخصص تالتة ورابعة. ولكن القاهرة و عين شمس التخصص من أولى و خاصة لو هتدخل انجليزي.
فى سنة أولى وتانية بتاخد مواد بتوضح كل اقسام ومجالات الكليه عشان تقدر تحدد بعدها هتختار انهى تخصص.
وطبعا فيه أقسام على حسب التقدير العام واقسام على حسب تقدير مواد معينة وعشان كده لو عايز قسم أو مجال معين لازم تشد حيلك فى المواد اللى القسم ده محتاجها عشان تتقبل، بالإضافة الي إن كل قسم بيكون محدد عدد طلبة معين عشان يدخلوه فشد حيلك قوي💪
نيجي بقا لنظام الدراسة
سنة أولى : بتاخد فى الترم 7 مواد
أغلب مواد سنة أولى بتبقي أحياء و كيميا وفيزيا ووراثة يعني مثلا زى مواد (كميا عضويه - وعلم حشرات - وعلم حيوان - وعلم النبات - وكميا تحليله )
وفيه كمان مواد أدبيه وإحصائية ( زي اقتصاد زراعى - و مجتمع ريفى )
وان شاء الله انت عندك خلفية عن المواد ديه من ثانوية عامة.🤓
سنة تانية : بتاخد مواد جديدة عليك
وبتكون اكتر مجالاتها نباتى و صناعى
زى مواد ( علم الألبان و نباتات الزينة و أساسيات الفاكهة و علم تصنيع الاغذية وأساسيات الخضر وكده )
بتحدد تخصصك ف معظم الكليات ف تالتة زي ما قولنا وبتكون أخدت فكرة عن كل قسم.
والدراسة في الكلية.. المفروض عملية،
بس للأسف الواقع غير كده كالعادة🤦‍♀️ فممكن نقول إن التلت بيبقى عملى فعلا والتلتين نظرى وهتلاقي في مواد كلها عملى ومفيهاش نظرى.
بس عامة يعني العملى في الكلية ممتع جدا فى كل الاقسام، وجزء العملي ده بيعتمد على ميزانية الكلية💲. يعني في جامعات بتجيب أدوات وفيه جامعات لا وانت وظروفك بقا.
طبعا هتقولي العملي بيبقي عباره عن ايه ؟
 بص بقا هو بيختلف جامعه لغيرها وحسب المستوي برضو.. بس كله بيبقي في معامل مخصصه وحسب القسم بتاعك بيبقي شكل العملي
يعني مثلا قسم وقايه النبات .. العملي بتاعه بيقي في ٥ معامل تقريبا
عندك معمل مبيدات
ومعمل مكافحة الحيوية وإنتاج التطفلات
ومعمل النمياتودا والاكاروس
رمعمل الدراسات البيئية
ومعمل الفسيولوجي
وهكذا..  
وملحوظة صغيره عن جامعة القاهره .. عشان هيا مختلفه شوية عن باقي الكليات  يعني ماشيه بنظام الساعات المعتمده  وفيها انجليزي ودولي وعربي وكده
لغة الدراسة (عربي-انجليزي-فرنساوي ) طب بيعتمد الانجليزي علي درجتك في الانجليزي ولازم تكون 80 % فيما فوق انما بالنسبة للفرنساوي متاح قسم الالبان بس  فدرجتك في الانجليزي  80 %فيما فوق +الفرنساوي 75% فيما فوق  وبتدرس في اولي وتانية بالانجليزي وتالتة ورابعة بالفرنساوي .بس بيبقوا مصاريفهم عالية عن العربي علي حسب كل جامعة برضو
طيب احنا متفقين من الاول انك اكيد مش هتتطلع من الكلية تزرع والهبل ده .. بس انت هتشتغل ايه بقا؟🤓
بص خريج زراعة ممكن يشتغل
في شركات استيراد وتصدير
وممكن في شركات كيماويات
وحجر صحى في المزارع
وشركات الاغذية والألبان ومزارع فاكهه و معهد الدراسات العليا والبحوث للزراعة  والمنطق القاحلة  من اكتر الحاجات اللى متوفرة فى الشغل بس بتكون عايزة تقدير عالى  هى مراكز البحوث.
ومجالات وفرص الشغل بتفرق من قسم للتاني .. بس بحاجات بسيطه يعنى بنسبه 10% القسم بتاعك بيفرق فى الشغل
فمثلا فيها اماكن ومجالات شغل بتحتاج للشباب أكتر وبيبقى صعب على البنات🙍‍♀️، زي شغل الشركات والمصانع والمزراع وبتحتاج شغل بليل.
لكن البنات غالبا بتبقى مطلوبة اكتر في الشغل الإداري والمعامل🤷‍♀️.
وأهم حاجه عشان تلاقى فرص شغل كويسة وتعرف تحدد قسمك .. حاول تروح للدكاترة اللى هتعرفهم فى الكلية وهما هيعرفوكم على مجالات الشغل والقسم اللى هتختاره.وهيعرفوا الشركات إنكم موجدين . لإن فيه شغل كتير بيبقى عايز خريجين زراعة بس صعب يوصلولهم🤦‍♂️، وحاول يكون ليك علاقة مع الي اتخرجوا عشان يساعدوك.
ودور على شغل او علي تدريب علي جوجل من أول سنة كلية وقدم فيه
وهتتقبل وهتكون الشركات دى عايزاك بعد ما تتخرج وكل التدريبات هتتحط فى السي ڤي بتاعتك في الاخر 🤓
اخر حاجه خالص 😶 التقدير سهل في الكلية🤕، والكلية جميلة وممتعة للي يحطها في دماغه . وممكن تشتغل فيها من وانت لسه في الكلية.
فحاول تستفيد بكل حاجة بتتعلمها عشان هتفيدك بعدين.🤓
===================
#كلية_فنون_تطبيقية
كلية النص مهندس والتاني فنان 😌😎🎨
بما إننا هنبدأ ف كليات الفنون 🎨
ف خلينا نبدأ بحل لغز كليات الفنون باسماءها بالشعب ال بتقبل منها 😁:
📍الفنون التطبيقية: بتقبل من علمي رياضة - علوم
📍الفنون الجميلة: ودي متقسمة لـ 3 أجزاء:
- قسم عمارة: بتقبل من علمي رياضة بس
- قسم ديكور: بيقبل من علمي علوم - رياضة
- فنون (ال هي باقي الاقسام): بتقبل من علمي وأدبي
📍التربية الفنية: بتقبل من جميع الشعب
🎨 فنون تطبيقية من الكليات ال لازم تنجح ف امتحان القدرات بتاعها عشان تتقبل فيها + المجموع بتاعك.
(هنقول تفاصيل أكتر عن القدرات ف أول كومنت)
📍السؤال الأذلي عن فنون تطبيقية، هو لازم أكون باعرف ارسم كويس عشان ادخل فنون تطبيقية؟
لأ مش لازم، أنت بتحتاج اساسيات ف الرسم وبتقدر تتعلمها ف الكلية ببساطة، لأن الرسم مهارة مش موهبة يعني مش لازم تتولد بيها لكن عادي جدا تتعلمها ودا عن تجربة جدا ع أكتر من شخص 🤠
📍 الدراسة:
أساس فنون تطبيقية هو التصميم، ف كل المواد ف الخمس سنين بتخدم إنك تكون خريج قادر تصمم أي عمل فني بناء ع أساسات مش بعشوائية.
الكلية 5 سنين مقسومة سنة اعدادي و4 سنين تخصص..
- سنة اعدادي (ف جامعة دمياط اسمه القسم العام): ودي هتاخد فيها مواد تأسيسية ف التصميم زي أسس تصميم، ومنظور حر/هندسي، خطوط، متاحف، رسم هندسي، هندسة وصفية.
 وفي مواد عامة زي الفيزيا والكميا والميكانيكا والديناميكا، بتكون سهلة جدا وبسيطة حتى لو إنت علمي علوم بتقدر تفهم المواد الرياضية كويس عادي.
- التخصص:
⚠️توضيح إن ف تعريفك سنوات الكلية، بتقول أنا أولى تخصص، ال هي تانية جامعة لأن عندك سنة اعدادي 😅
⚠️ طيب فنون تطبيقية موحودة ف جامعات إيه اصلا ؟
موجودة ف 4 جامعات حكومية (حلوان وبنها وبني سويف ودمياط).
⚠️ بيكون في تنسيق داخلي للتخصصات بعد سنة اعدادي، بيكون نفس النظام بتاع ثانوي إنك بعد النتيجة بتدخل الرغبات بتاعتك وبعدين بتظهر النتيجة وبعدين بيظهر تنسيق الأقسام وبتعرف إنت اتخصصت إيه.
⚠️ الأقسام الأساسية = 14 قسم موجودين كلهم ف جامعة حلوان وجامعة دمياط، لكن بنها وبني سويف فيهم اقسام ناقصة.
📍الأقسام:
1️⃣ قسم الفوتوغرافيا والسينما والتليفزيون: من اسمه، فأنت بتتعلم فيه اساسيات تصوير سواء صور أو أفلام قصيرة أو طويلة أو برامج تليفزيونية، لأنك بتتعلم فيها اضاءة وكاميرات
⛔ ممكن تشتغل كمخرج سواء برامج أو أفلام، وممكن يبقي لك الكارير بتاعك ف الأفلام القصيرة وتدخل بيها مسابقات.
⚠️ مش موجود ف بنها وبني سويف
2️⃣ قسم الطباعة والنشر والتغليف: ودا القسم ال بيهتم بالمطبوعات الورقية والبنارات، زي الكتب والمجلات وبنارات الاعلانات ال بتبقي متعلقة سواء ف الشارع او ع الكباري وغيره.
وكمان بيهتم بعلب التغليف للمنتجات ال بتتباع، سواء المنتجات الغذائية زي الشيبسيهات والمكرونات وهكذا، أو غيره.
⛔ بتشتغل ف المطابع، زي مطابع الاهرام والجمهورية، أو شركات التعبئة والتغليف ودي كتيير جدا.
3️⃣ قسم الدعاية والإعلان: أي شركة دلوقتي سواء start up او شركة بقالها مدة مش بتتحرك من غير لوجو، أو شعار ليها، دا جزء من مهام قسم الاعلان، وكمان الاعلانات التليفزيونية وأفكارها، والبوسترات سواء التوعوية او الاعلانية ال بتنزل ع الكباري او بتتعرض ف الشوارع، وكمان بيتعلموا أنميشن وتحريك.
⛔ ممكن تشتغل في شركات الدعاية والاعلان، ودي بيكون الشغل فيها عن طريق عميل فرد أو شركة بيجي يتفق مع الشركة ع فلوس معينة لشغل معين، بعد كدا بيبدأ يقعد معاك كمصمم اعلانات ويقولك هو عايز إيه بالظبط، وإنت تبدأ تصيغ دا ف صورة اعلان.
أو ممكن تشتغل شغل حر freelancer ودا مشكلته إن انت ال بتتفق مع العميل ع الفلوس والوقت وكل حاجة وكمان بتعرف متطلباته وبتشتغل، وكمان بتحتاج تبني اسم كويس ف السوق عشان الناس تيجيلك وتتعامل معاك مباشر، ميزته إنك بتكون حر نفسك بتظبط وقتك زي ما تحب على حسب نظام يومك مش مضطر تنزل الساعة 8 وتروح الساعة 5 😅.
⚠️ في جامعة بنها، قسم التاني والتالت متجمعين ف قسم واحد اسمه دعاية واعلان وطباعة ونشر، وبيدرسوا مواد التخصصين مع بعض ف الاربع سنين.
⚠️مش موجودين ف بني سويف
4️⃣ قسم التصميم الداخلى والأثاث: ودا بيهتم بالتصاميم الداخلية لأي مبني، بيكون هو وقسم عمارة ف هندسة مكملين لبعض، مع إن تصميم داخلي بياخد جزء معماري وكذلك عمارة بياخد جزء تصميم داخلي.
وكمان تصميم داخلي متوسع شوية لانه ممكن يهتم بالديكورات الداخلية للمسارح أو الكادارات التليفزيونية، أو ديكورات الافلام.
وكمان إنه بيبقي فيه جزء أثاثي، فانت بتتعلم عن انواع الاخشاب واشكالها وايه نستخدمه فين وهكذا.
⛔ ممكن تشتغل ف مكتب تصميم داخلي او مكاتب تصميم العمارة.
5️⃣ قسم التصميم الصناعي: في بعض الكليات اسمه تصميم منتجات، وبيهتم بتصميم الديزاين الخارجي لأي منتج صناعي من الابرة للصاروخ حرفيا 😎.
وبيكون مكمّل لقسم هندسة ميكانيكا، مع إنهم ف تصميم صناعي بياخدي جزء ميكانيكي لكنه بيكون سهل وبسيط للمنتجات البسيطة سواء اليدوية أو الكهربية.
⛔ شغلك بيكون ف مصانع المنتجات، بيكون في سيكشن اسمه البحث والتطوير ف المصانع ودا ال بيكون مسئول إنه يحط الديزاينز الخارجة سواء لمنتجات جديدة أو تطوير ع منتجات موجودة بالفعل.
6️⃣ قسم الاثاثات المعدنية والإنشاءات المعدنية والحديدية: بيهتم بالاثاث المعدني زي مثلا لما بتدخل أي عيادة بتلاقي كراسي او مقاعد معدنية، وأي كراسي او مقاعد معدنية بيكون دا جزء من شغله، لكن هو بيتوسع أكتر من كدا كمان.
7️⃣ قسم المنتجات المعدنية والحُليّ: طب إيه الفرق بينه وبين الأثاثات المعدنية؟ إن دا بيهتم بالمنتجات البسيطة زي المكتبات المعدنية أو التابلوهات المعدنية وغيره، مش بيتدخل أوي ف الأثاثات، وكمان دا بيكون زايد عليه إنه بيهتم بالأكسسوريز المعدنية وكمان حلي البيوت زي الاباليك والنجف.
⛔ شغله كحلي بيكون في شركات الذهب أو المديليات المعدنية أو العملات المعدنية وغيره وكمان شركات النجف والكرستالات زي كرستال عصفور.
⚠ في حامعة بنها،️ القسم ال 6 وال 7 مجموعين ف قسم واحد.
⚠️ مش موجودين ف جامعة بني سويف.
8️⃣ قسم الخزف: بيتعلموا فيه تقنيات ووسائل الخزف المختلفة، بيدرسوا أنواع الأطيان(جمع طين)😂 وبيحللوها عشان يعرفوا أنهي نوع يستخدم ف إيه، وبيعرفوا عن الافران الحرارية وازاي يستخداموها وكمان صيانتها، وبيتدربوا ع تصميم الخزف الصناعي واليدوي والدولاب.
⚠️مش موجود ف بنها وبني سويف
9️⃣ قسم الزجاج: بيدرسوا فيه كل حاجة ليها علاقة بالزجاج وبالتالي بيقدروا يوظفوها ف كل حاجة بعد كدا، سواء مباني معمارية او العبوات الزجاجية زي البرطمانات والازايز، وغيرهم..
وكمان بيتعلموا وسائل ترميم الزجاج والرسم عليه ممكن تسيرش عليه، هتشوف شكله وبيكون من الحاجات المطلوبة جدا وكمان اسعارها عالية.
⚠️مش موجود ف بنها وبني سويف
🔟 قسم الزخرفة: بيتعلموا التنسيقات الجمالية للاماكن سواء الداخلية او الخارجية، ودا بيكون واسع جدا بقي سواء ميادين او حدائق او منازل بتصميم ورق الحائط وغيرها.
⚠️مش موجود ف بنها وبني سويف
1️⃣1️⃣ قسم النحت والتشكيل المعمارى والترميم: ودا بيهتم ب3 أجزاء، اول حاجة المنحوتات المعمارية ال بتكون في أي مكان اثري، أو قصور والنصب التذكارية وهكذا..
تاني حاجة بيهتم بالترميم ف المنشآت الأثرية، زي المساجد والمتاحف، لو نزلت المعز هتلاقي مهندسين نحت، أو كلية آثار شغالين ف الترميم ف اجزاء كتير منه.
⚠️ مش موجود ف بني سويف.
1️⃣2️⃣ الغزل والنسيج والتريكو: ودا القسم ال بيهتم بالخيوط والأنسجة عشان نطلع القماش ايا كان شكله او خامته أو نوعه، وكمان شغله ف السجاد بيكون كويس جدا لأن السجاد عبارة عن خيوط مترتبة بشكل معين بيدينا شكل السجادة
⛔ فشغله بيكون في الانسجة المنتشرة جدا ف المحلة الكبرى، أو مصانع السجاد زي النساجون وسيرا وغيرهم.
1️⃣3️⃣ قسم طباعة المنسوجات والصباغة والتجهيز: أي بيجامة أو ملاية دلوقتي بيكون الشغل ال عليها مطبوع، القسم دا هو ال بيهتم بالديزاينز دي يكون شكلها حلو ولذيذ وكمان بيتعلم ازاي يطبع اي ديزاين ع اي قماشة وطريقة الطباعة بتختلف ع حسب القماشة هو بيتعلم دا بقي 😁
1️⃣4️⃣ قسم الملابس الجاهزة: هو تصميم الازياء، بس كدا ؟ اومال انت فاكر ايه 😂
لكنهم بيتعملوا ازاي يصمموا ملابس جاهزة لكل الاعمار السنية من كبير لصغير، وكمان بيتعلموا يعملوا منتجات جلدية سواء شنط او غيرها.
⚠️ مش موجود ف بني سويف
⚠️ يبقي المجموع 8 اقسام ف جامعة بنها، و4 أقسام في جامعة بني سويف،، وممكن تحول بعد اعدادي من جامعة لجامعة، لكن بيكون التحويل صعب شوية ولازم تتحرك فيه من بدري.
⚠️ اقسام فنون تطبيقية من أكتر المجالات ال بتكون مطلوبة ف سوق الشغل، فأنت بمجرد ما بتتخرج بتلاقي شغل مناسب ليك ف اكتر من مكان، المهم إنك تكون شغال ع نفسك كويس ومش معتمد بس ع الكلية.
📍طبيعة الدراسة:
1. جزء عملي: ودا جزء كبير جدا ومهم جدا ف الكلية ف اي تخصص، ودا ال بنعمل فيه مشاريع ولوحات وبنسهر ف الكلية ونطبق ف البيت بالأيام عشان ننجزه وممكن بعد دا كله يترفض وتروح تعيده زي العسل كدا 😂😌🙊
2. جزء نظري: هو مهم جدا عشان المعلومات النظرية بتساعد ف التطبيق، لكن مش بيحتاج مجهود ومعظم الدكاترة بيكونوا مقدرين إننا مسحولين ف العملي فبيسهلوا علينا النظري 😁

====================
#كلية_تجارة
◾كلية البشوات زمان وكلية الشعب دلوقتي؟🤔
- ايوه هي ال جت في دماغك علطول😌
《كلية تجارة》
◾الكلية ال معظمنا بيكون رافضها فى البداية ، بس أول ما بيتزنق بتكون أول بديل حقيقى بيفكر فيه وبنكتشف انها مش بالسوء اللى احنا متخيلينه ده
والعظيم جدا ان فيه ناس بتختارها وبتفضلها عن كليات كتير تانيه وبتختار تكمل في المجال ده بنفسها
◾مبدأيا كدة كلية التجارة هي كلية نيتها صافية جدا
علشان بتقدر تدخلها من علمى علوم ورياضة وأدبى
مش كدة وبس علشان كمان دى من الكليات اللى فيها انتظام و انتساب🤓
◾ طيب ايه الفرق بين انتظام وانتساب موجه ؟👀
- انتظام مجموعها بيكون أعلى من مجموع انتساب
- بيكون ليك حضور سكاشن لكن انتساب لا
- اغلب  الجامعات لو مش كلها ليها حضور سواء محاضرات او سكاشن بس في انتساب مفيش حضور وغياب
- وكمان مصروفات انتظام أقل من مصروفات انتساب
- انتظام مميزة فى فكرة انك ممكن تدخل انجليزي لكن فى انتساب لا
《 ممكن اغلب الجامعات لا لكن تجارة اسيوط عادي انجلش انتساب واسأل في الجامعة اللي هتقدم فيها + ان المصاريف ممكن تكون اكتر من انتظام شويتين 》💰
- وكمان بعض الأقسام اللى هنتكلم عنها كمان شوية زى اكتوارى مينفعش تدخلها من انتساب 🤦‍♂️🤦‍♀️
- بس كده مش أكتر غير كده فالباقى نفس المواد
◾وغالبا تجارة بتبقي مرحله اولي وتانيه بالنسبه لانتظام..
لكن فى المرحلة التالتة .. مبتبقاش موجوده غير لانتساب موجه بس
◾ لغات الدراسة فى الكلية دى 3 لغات عربى وانجليزى وفرنساوى
- عربى موجودة فى كل كليات تجارة وكذلك انجليزى لكن فرنساوى موجودة بس فى 《جامعة عين شمس وجامعة اسكندرية》
◾طيب لو أنا عاوز أدخل انجليزى فيه شروط لده ؟
آه فى شروط ..
أول حاجة ان يكون جايلك فى التنسيق تجارة انتظام
《الباقي هتعرفه في البوست الجاي👋》
◾بالنسبة لفرنساوى فلازم يكون جايلك في التنسيق تجارة انتظام بردو + درجة معينة في الفرنساوي الجامعة هي ال بتحددها و من خلال المجموع الاعتباري 《مجموعك الكلي + درجة الفرنساوي》 بيتحدد أنت هتتقبل ولالا🤔
     وعموماً متقلقش الموضوع مش صعب زي ما انت متخيل
◾ايه الفرق بين تجارة عربى وتجارة انجليزى ؟
- تجارة عربي بتدرس فيها المواد بالعربي + إن الكتب بتبقى من تأليف الدكتور أو الجامعة عموما من خلال هيئة التدريس فيها
《أكيد هتستنى البوست الجاي عشان تعرف إبه المختلف في تجارة انجلش😌》
◾بعض الآراء بتقول ان تجارة انجليش أفضل من ناحية فرص الشغل وهكذا وفى آراء تانية بتقول ان الاتنين متساويين فى حالة ان خريج تجارة عربى أخد كورسات اقتصاد او محاسبة بالانجليزي وهكذا
◾عموما المعيار النهائي اللى بيفرق فعلا مدى فهمك للمادة العلمية وأى حاجة تانية ممكن تتدارك مع الوقت 🙌
- كدة احنا خلصنا تشعبات اللغات ندخل على الدراسة والأقسام
◾الكلية 4 سنين بعدها بتتخرج بدرجة البكالريوس
وبتبدأ تدرس في الكلية
《1》- المحاسبة وفروعها
《2》- إدارة الأعمال وفروعها
《3》- التأمين وفروعه
《4》-الاقتصاد وفروعه
 《5》- الإحصا، الرياضة، القانون دى المواد اللى فى الغالب كلكم بتدرسوها قبل التخصص  
◾طيب سؤال اتسأل لينا هو أنا لازم أكون شاطر فى الرياضة ؟ والرياضة هناك شبه رياضة ثانوى كدة ؟
- اولا فلأ مش ضرورى تكون شاطر فى الرياضة
- ثانيا فيه مواد بتكون فيها الرياضة شبه ثانوى وفيه مواد بتكون مختلفة يعنى بتاخد رياضة بحتة زى اللى أخدتها قبل كدة وبيقي فيه《رياضة أعمال》 دي خاصة بالمواد التجارية ودى ال انت هتاخدها أول مرة فى الكلية ومبتبقاش شبه رياضة ثانوي👌
◾طيب ايه التخصصات اللى موجودة ؟ وبتخصص من امتى ؟
- بالنسبة للأقسام والتخصصات :
- الأقسام الشائعة اللى بتيجى فى بالنا أول ما بنسمع سيرة كلية التجارة هى وبلا شك
                       《المحاسبة وادارة الأعمال》
- وهما متوفرين فى كل الجامعات
 بتدخل الكلية تقعد 3 سنين وبعدين تختار فى السنة الأخيرة هتكمل محاسبة ولا ادارة أعمال وفي أغلب الجامعات بيكون التخصص من سنة 3 ✔
◾بالنسبة للمحاسبة :
- المحاسبة عموما الدراسة فيها تراكمية فبتحتاج فيها تكون فاهم كويس مواد المحاسبة فى السنين كلها وبتتخرج دارس كل أنواع المحاسبة وشويه مواد من اقتصاد اللى بتأهلك تكون محاسب شاطر قادر تعمل أى حسابات وتظبط الميزانية
وحاليا فيه شهادة اسمها شهادة 《CMA》ودى اختصار لCertified Management Accountant
《معناها بالعربى شهادة المحاسب الإدارى المعتمد 》
- الشهادة دى بتديك القدرة انك تدرس البيانات ال متوفره عندك ومن خلال البيانات دى تاخد قرارت ادارية والشهاده دي بتفرق فى مستواك فى الشغل جدا وبتوفرلك فرص شغل فى أماكن أحسن🏦
◾اما بقى إدارة أعمال:
- فانت هتركز على دراسة الموارد البشرية ودراسة الجدوى ومشروعات صغيرة وتسويق 👨‍💻👩‍💻
- وعدد الطلبة فى القسم ده بيكون أقل من محاسبة بس يعتبر العدد فيه كبير نسبيا بردو وبالنسبة للجامعات ال بتتخصص ادارة من سنة تالتة فبيتشعبوا في سنة 4 إما تسويق أو موارد بشرية أو ميزانيات وهكذا
◾دى الأقسام المعروفة لمعظمنا بشكل كبير
                                 لكن
في كام قسم كدة معظمنا ميسمعش عنهم وبيوفروا بديل حقيقى لطلبة كتير عندهم اهتمامات مختلفة عن المجالات التقلييدية لتجارة 💡
◾هنبدأ بقسم الإقتصاد والتجارة الخارجية :
- ده هنلاقيه فى جامعة حلوان بس والتخصصات الرئيسية اللى بتدرسها فى القسم ده هى :
- الافتصاد
- الاقتصاد الأولى
- التجارة الخارجية
وده يعتبر بديل كويس جدا ل ال ملحقش اقتصاد وعلوم سياسية وكان عاوز يتخصص اقتصاد لان القسم ده أصلا كان موجود قبل تأسيس كلية الاقتصاد والعلوم السياسية فى جامعة القاهرة ولما اتفتح سياسه واقتصاد في اسكندريه الكلية قامت علي المعيدين والدكاتره ال من القسم ده في تجاره
◾التخصص التانى هو :
- تخصص إدارة الأعمال ونظم المعلومات ال بنختصره فى BIS وال هى اختصار ل
 《Business  Information System 》
وهنا انت بتدخل على القسم ده على طول وبتقضى ال4 سنين فيه وهو بمصروفات بتختلف من جامعة لجامعة  
الدراسة فيه بتتقسم علي ال4 سنين
- أول سنتين بتدرس فيهم مواد تجارية ومواد عامة زى مهارات الاتصال و هكذا
- تاني سنتين واللى بيميزوه بشكل كبير بتدرس فيهم شبكات ، برمجة ، نظم
◾وال بيدرسلك غالبا بيكون دكاترة من هندسة وحاسبات
القسم عموما مش موجود غير في جامعة حلوان وجامعة طنطا  وبيعتبر من الأقسام المستحدثة 🙏
◾آخر قسم هنتكلم عنه ومش كتير يسمع عنه هو قسم 《اكتوارى 》
- ايه اكتوارى دى ؟ كلموني عربي لو سمحتم😣
- اكتوارى ده علم بنسميه علم تخمين المخاطر《 Actuarial science 》
-  بعمل فيه ايه بقى ؟
◾بص يا سيدى ده عبارة عن انك بتستخدم الطرق الحسابية والاحصائية علشان تقدر المخاطر فى قطاعات التأمين والصناعات المالية بمعنى تانى الاكتواريين دول بيشوفو ايه هى احتمالية التغيرات والأحداث اللى هتحصل علشان يقللوا الخساير  وبيدبروا وبيحطوا حلول فى حالة حصل أى تغير سلبى علشان الدنيا متبوظش 😎
- طيب بالنسبة للقسم ؟
- بص يا فندم مبدئيا هو مش موجود غير فى《 جامعة القاهرة والجامعة الأمريكية 》
- بتدخله بعد ما بتقضى سنة أولى فى الكلية سواء كنت تجارة عربى أو انجليزى (ده فى حالة انك فى جامعة القاهرة يعنى) مش الجامعة الأمريكية يعني أحنا غلابة "))
◾طيب ايه المواد الرئيسية اللى بتدرسها ؟ 👀
- بتدرس فيه مجموعة من مواد الرياضة والاحصاء والتأمين .
- وده كده يعتبر نبذة عن أقسام مختلفة👌
◾طيب آخر حاجة مجالات الشغل عموما ايه ؟
- خرجين قسم محاسبة بيشتغلوا عموما فى المحاسبة الادارية ، ومحاسبة التكاليف ، وفى البنوك وفى مصالح الضرايب المختلفة ✏🗒
- وخرجين ادارة أعمال بيشتغلو فى ادارة الموارد البشرية يعنى بيبقو مسئولين عن الموظفين فى الشركات أو أى مؤسسة عموما وبيتابعو معاهم شغلهم وكفاءتهم وبيقيموهم وبيوفرولهم التدريبات اللازمة 《HR》
- وممكن يشتغلوا كمان في التسويق والشركات المالية والبنوك والبورصات والهيئات العامة 《marketing 》
- وخرجين اقتصاد وتجارة خارجية بيكونوا اخصائيين اقتصاديين واخصائين في التصدير والاستيراد
وشركات التأمين وهكذا 🙌
◾عموما مفيش مكان شغل مبنحتاجش فيه لخريجين كلية التجارة بأنواعهم
《ملاحظة مهمة》:
سكك الشغل متاحة بشكل كبير ومش مقتصرة بس على مجال البنوك والمجالات المعروفه في تجارة
◾ اهم حاجه انك تطور من نفسك وخليك دايما متابع وشوف ايه هينميك وتاخده يعنى انت مثلا ممكن تشتغل فى الصحافة الاقتصادية لو مهتم بالصحافة أو مراكز الدراسات الاقتصادية ده غير انك ممكن تشتغل فى التدريب 👀
◾المتخصص بمعني انك تدي للناس زي كورسات فى مادة من المواد اللى درستها أو نوع محاسبة أو انك تشتغل في تدريب على تنمية المهارات عموما ده غير طبعا مجال الماركتينج أو التسويق وقد ايه هو مجال واسع ومطلوب بشكل كبير😎
◾وال عايزبن نأكد عليه ان الكلية دى من أكتر الكليات اللى ممكن تشتغل فيها على نفسك بعيدا عن الجامعة اللى انت فيها😀
- الكورسات الأونلاين المجانية وال مش مجانية متاحة فيها بشكل كبير وهتسهلك انك تتعلم صح
◾ونصيحة كدة اخيره حاول تظبط الانجليزى بتاعك لأنه هيفيدك كتير سواء هتاخد كورسات أونلاين فبتبقى بالانجليزي أو لو هتستخدم مراجع أو لو مقدم على شغل فهتحتاج انجليزي كويس معاك 👀
◾وبيبقى فيه كل سنة تدريبات الكلية بتوفرها للطلبة اللى تقديراتهم عالية فى البنوك حاول تاخدها لأنها هتفيدك جدا

======================
#كلية_تجارةE
◾كليه تجاره شعبه اللغة الانجليزية🏛
 ◾الكلية جزء من تجارة بس الدراسة فيها بتكون بالانجليزي✅
◾طب إيه الفرق بين تجارة وتجارة انجلش؟ 👀
《1》- الكتب في أغلب الأحيان مش بتتألف في مصر و بتبقى متألفة في دول تانية زي 《بريطانيا وكندا》                           
《2》- اماكن الدراسة مجهزة بشكل أفضل في تجارة إنجلش عن تجارة كمان الأعداد في تجارة إنجلش بتبقى أقل ودي ميزة 👌
《3》- الكلية بمصروفات بتختلف من جامعة لجامعة بس المتوسط بيبقى من 9000 ل 15000 وممكن تقل أو تزيد حسب الجامعة 💸
《4》- عشان تدخل الكلية لازم تبقى جايب درجة معينه في الانجليزي ودي بتختلف من جامعة لجامعة يعني مش حاجة ثابتة 🙌
◾الأقسام ✍ :
- أساس الكلية إن فيها 6 أقسام رئيسية بس بيختلف وجودهم من جامعة لجامعة وهما :
1- المحاسبة : أكبر قسم من حيث الأعداد 📊
2- ادارة الاعمال : من أكتر الأقسام ال عليها إقبال بعد محاسبة🤓
《والقسمين دول موجودين في جميع الجامعات》
3- الاحصاء والتأمين
4- الاقتصاد
5- التجارة الخارجية
6- سياسة
《ودول بيختلف وحودهم من جامعة لجامعة》
  ◾نظام الدراسة : ✍              
  - مدة الكلية 4 سنوات              
- في أول سنتين الدراسة بتبقى عامة بمعنى إنك بتدرس مواد من كل الأقسام وكل التخصصات
- في سنة 3 بتبدء تتخصص في قسم من الأقسام وفي بعض الجامعات بيبقى التخصص من سنة 4 حسب نظام الجامعة
كمان في أقسام معينة ممكن التخصص فيها يكون من سنة 2  زى 《قسم سياسة في جامعة أسيوط》💡
- التقييم أو الدرجات عموما بتبقي على 3 حاجات هما :
1- اعمال السنة
2- امتحان الميد ترم
3- امتحان نهاية الترم
《وبتختلف من جامعة لجامعة لإن أوقات في جامعات بتقيم على أساس presentations بيعملها الطلبة في مواد معينة》📚
◾مينفعش أبدا يبقى عندي شركة أو مؤسسة منغير خريج كلية تجارة
طب ليه ⁉️
- خريج الكلية بيكون على علم واسع محاسبيا او في الجوانب الادارية ب《مبيعات - خدمة عملاء - تسويق - موارد بشرية - استثمار وغيرها من التخصصات المختلفة 》
◾هنتكلم دلوقتي عن فرص العمل للقسمين الأساسيين في الكلية وهما 《 محاسبة و إدارة أعمال 》
- محاسبة :
خريج قسم محاسبة بيبقى ليه فرص كتير في أماكن كتير زي 《البنوك وشركات المحاسبة والضرائب》 هما أكتر الأماكن احتياجا لخريجي القسم
- وأنت كطالب تجارة بتبقى محتاج شهادات تزيد من خبرتك  زي 《CMA , CIA , CFA , CPA <IFRS 》و كلهم شهادات معتمدة دولياً😎
- وخريج كلية تجارة وخصوصا قسم محاسبة مش بس بيشتغل في بنوك أو شركات محاسبية ،كمان يقدر يشتغل في 《المستشفيات وشركات الادوية و الشركات الخاصة》 وعموما اي استثمار لازم يبقى فيه جزء الحسابات✏🗒
◾إدارة أعمال : 👩‍💻👨‍💻
- خريج قسم إدارة أعمال بيبقى عنده خبره في كذا مجال منهم 《التسويق - الموارد البشرية - خدمة العملاء - الادارة وغيرهم 》
-  بيبقى متاح لخريج قسم إدارة أعمال الشغل في كل الأماكن ال قولنا عليها لقسم محاسبة من شركات وبنوك ومستشفيات وغيرهم بس في positions مختلفة تتناسب مع طبيعة دراسته
زي مثلا شغله ك HR / PR / Marketeer وغيرهم✅
-  خريج القسم بيحتاج لشهادات ودراسات تانية عشان يزود معلوماته زي مثلا شهادة MBA
- خريج القسم ده بيبقى مؤهل لإنه يعمل المشروع الخاص بيه ويدرسه من كل الجوانب عشان يطلع بالنتيجة المناسبة في النهاية 👌
◾الكلية مش سهلة ومش صعبة هي محتاجة استثمار لوقتك فيها و استغلال كل الفرص المتاحة لأنك تتعلم و متكتفيش بدراسة الكلية بس لازم يبقى عندك نظرة أوسع
إبحث ودور واجتهد عشان تتعلم وتواجه سوق العمل😀
==============
#كلية_الحقوق
مجرد ما نسمع اسم كلية الحقوق هيتردد ف ودننا جملة بصدي سينمائي رهيب: ( إنت فاكرنا عايشين ف غاابة !! 😡 )
ودا اساس كلية الحقوق، إننا بشر وبنتعامل مع بعض طول الوقت، فلو مكنش في قوانين بتحكم الأطراف ال عايشة وبتحفظ حقوق كل شخص ف المجمتع هنكون عايشين فعلا ف غابة !
عشان كدا كلية الحقوق من أهم الكليات الموجودة ف مصر، لأنها مرتبطة بالعدل ⚖
وهي مش بس كلية قيمتها عالية جدا، لكن الأهم إنها ممتعة جدا ف دراستها..
⚠️ هيطلع واحد يقول يا عم كويسة ايه بس ؟! صل ع النبي ف قلبك 🥱
ودا لأنه مش مستوعب قيمتها ولا هي من اهتماماته، لكن دخلها عشان كلية وخلاص، ودا مش صح..
دراسة الحقوق والقوانين ومعرفة الأحكام والعقوبات والجزاءات ممتعة جدا..
فكرة إنك تبقي عندك قضية وتبدأ تدور وتدعبس فيها وتجتهد عشان توصل للحقيقة بتكون رحلة ممتعة جدا الحقيقة 😍
📍معلومات عن الكلية:
- موجودة ف كل جامعات مصر.
- في منها انتظام وانتساب (الفرق ببساطة إن انتظام تنسيقها أعلى ومصاريف أقل، انتساب تنسيق أقل ومصاريف أعلى،، لكن الدراسة بتكون نفسها، وبتكونوا ف نفس الكلية مع بعض)
- الكلية موجودة بلغات:
عربي: مش له أي شروط، غير إنك تكون جايب المجموع.
انجليزي: بيكون بمصروفات، موجودة كانتظام بس مفيش انتساب، وجايب ف الانجليزي أكتر من 80% من مجموعها = تقريبا 40/50.
فرنساوي: بيكون في امتحان تحريري، وامتحان شفوي لازم تجتازهم الاتنين عشان تتقبل ف القسم الفرنساوي، ويكون مستواك ( DELF  B2 ) ف الفرنساوي.
وف القسم الفرنساوي بتكون بتدرس بجانبين المصري والفرنساوي، عشان كدا مصاريفها بتكون غالية شويتين تلاتة 😂.
📍الدراسة:
- الكلية 4 سنين
- بتختلف المواد حسب كل جامعة وإيه امكانياتها ف توفير دكاترة للمواد دي، لكن في مواد أساسية لازم بتتعلمها ف اي جامعة وهي أساس كلية الحقوق أصلا، ف تعالوا نشوف المواد دي زي إيه 😁:
1️⃣الشريعة الإسلامية: وبتدرس فيه الأحكام المذكورة ف الشريعة الإسلامية، ومع إن مصر دولة إسلامية ف المقام الأول لكن بيختلف تطبيق أحكام الشريعة الإسلامية حسب مدى تأثر الدستور بالشريعة دي.
لكنها مهمة جدا لاننا دايما محتاحين أشخاص فاهمين أحكام الفقه والشريعة الإسلامية عشان أحكام الميراث مثلاً.
2️⃣القانون المدني : بتتعرف فيه ع المؤسسات المدنية الموجودة وطبيعة عملها، وكمان ممكن تتعرف على قوانين المِلكِيّة والفكرية وإزاي تصيغها وتفهمها، وكمان بتدرسوا الأحوال الشخصية لغير المسلمين في القانون المدني، لأن القانون المدني هو المرجعية لغير المسلمين.
3️⃣القانون التجاري : ويشمل تخصصات القانون التجاري، القانون البحري، القانون الجوي، التشريعات التجارية لتنظيم المنافسة، وحماية المستهلك، ف الجزء دا من الدراسة مرتبط بالأعمال المالية والشركات والبنوك وغيرهم من المؤسسات.
4️⃣القانون الجنائي: جنائية = الجرايم والعقوبات، ودا مهم جدا لأنه غالب شغله ف مصر إن لو حد متهم ف قضية ومظلوم فيها بتبدأ تدافع عنه، وتحاول تعرف مين الجانى الحقيقي.
فأنت بتدرس ف الجزء دا القوانين والإجراءات الجنائية، وكل جريمة هيكون عقابها إيه بالظبط.
⚠️إنت بتحتاج تكون دقيق جدا ف اختيار قضاياك عشان متخرجش تدافع عن واحد فاسد وظالم ولإنك محامي شاطر ف هتقدر تخرجه، لكن لازم إنت تسعى لتنفيذ الحقوق اصلا
⚠️ بمعنى تاني خلي بالك من ضميرك 😇
5️⃣القانون العام : بيأهلك إنك تشتغل في مجال القانون الدستوري، عشان كدا بتدرس فيه تخصصات القانون الدستوري، والنظم السياسية، والقانون الإداري، والعقود الإدارية.
⚠️في أجزاء تانية بتقدر تدرسها أو تاخد نبذات عنها ع حسب كل جامعة زي:
- قانون المرافعات: بتدرس فيه قوانين المرافعات المدنية والتجارية.
- القانون الدولي العام: بتدرس فيه القانون الدولي العام و التنظيم الدولي.
- القانون الدولي الخاص: بتدرس فيه قوانين الجنسية، مركز الأجانب، وتنازع القوانين، وتنازع الأختصاص القضائي.
- فلسفة القانون وتاريخه: بتدرس فيه فلسفة القانون، تاريخ القانون، علم الإجتماع القانوني، والقانون الروماني.
- القانون الإجتماعي: بتدرس فيه قانون العمل والتأمينات الإجتماعية، القانون النقابي، وتشريعات التعاون.
- المالية العامة والقانون المالي والتشريعات الإقتصادية: و بتدرس فيه المالية العامة، القانون المالي والضرايب، التشريعات الإقتصادية و الإقتصاد.
وبعد كدا بتخلص وبتبقي جاهز لمواجهة الحياة العملية وبتبقى خريج ليسانس حقوق أد الدنيا 😎
والشغل منها واسع جدا جدا، فمفيش شركة أو حتى أعمال تجارية دلوقتي إلا وبتحتاج محامي ليها، وكمان ممكن تقدم بعدها ف كلية الشرطة، وممكن تشترك ف نقابة المحاميين عشان تقدر تمارس مهنة المحاماة.
وممكن تعمل دراسات عُليَا وتتخصص ف حاجة معينة، وتبقي محامي متخصص.
📍المذاكرة:
من اكتر الافكار المنتشرة عن كلية الحقوق إنها صعبة، ودا منطقي جدا إن الناس تبقي شايفة دا لإن الألفاظ القانونية والحقوقية مش متداولة اصلا ف حياتنا اليومية، عشان اقول إن كل الناس هتبقي فاهمة الالفاظ دي ومذاكرتها.
وبالتالي أه هتحتاج تجتهد شوية عشان تثبت حبة مفاهيم ومصطلحات ف دماغك، هتحتاج يبقي ليك ذاكرة كويسة عشان تربط بين القوانين وبعضها، والبنود الدستورية.
⚠️ عشان كدا مهم جدا تبقي داخل الكلية ومستعد ليها، ومهيأ نفسك للمذاكرة، والأهم هو (فهم) كل حاجة هتعدي عليك، لأن إنت لو مش فاهمها مش هتبقي فاهم تطبيقها عامل ازاي، وبالتالي مذاكرتك ليها هتكون بلح ف الآخر 🤦‍♀️🤷‍♀️.
⚠️ نقطة تانية مهمة جدا وهي التدريب ف مكاتب المحاماة، مع محامي مُمارس للمهنة، وتبدأ تشوف تطبيق القوانين النظرية ال إنت بتدرسها بيكون عامل ازاي ع أرض الواقع، والأفضل تبدأ فيها من بدري لو تقدر من اولى او تانية كلية 👏
وبكدا نكون اتكلمنا ف كل النقط المهمة ليك عشان تقرر الكلية دي مناسبة ليك ولا لا، لو عندك أي سؤال سيبه ف الكومنتات وهنرد عليك 😎.
==================
المعهد الفني الصحي
◾نظراً للتساؤلات الكتير عن المعهد الفني الصحي
في البوست ده إن شاء الله هنتكلم عنه ببعض التفصيل
- يلا 🤔
                                 《المعهد الفني الصحي 》
◾معهد فوق متوسط بتقدر تدخله من ثانوية عامة بشُعبتي العلمي 《علوم، رياضة 》 والدبلوم التجاري و المدارس الثانوية الصناعية 👌
◾ المعهد موجود في جامعات كتير زي بني سويف والمنصورة وطنطا وبورسعيد واسماعياية وسوهاج وأسوان وأسيوط وبنها والزقازيق وإمبابة وغيرهم
◾مدة الدراسة فيه 4 سنين بس منفصلين يعني سنتين دراسة وبعد كده تكليف بعد كده 《سنتين بكالريوس 》 اختياري
- كان مُقرر إن هيتم دمجهم ويبقوا 4 سنين بعدهم تكليف كمدة دراسة فعلية بس الحقيقة معندناش معلومات أكيدة إذا القرار اتنفذ أو لا 🤓
◾المعهد فيه أقسام كتير وبتختلف من جامعة لجامعة بس في المجمل هما  :
- المعاونون الصحييون
- المعامل
- الأشعة
- صناعة الأسنان
- التسجيل الصحي والإحصاء
- التمريض
- صيانة الأجهزة الطبية
- شعبة الرعاية الطبية العاجلة
- شعبة التوليد وصحة المجتمع
-  شعبة التمريض النفسى والصحة النفسية
 - شعبة الطوارئ والحالات الحرجة
 - شعبة تمريض الأورام
◾هنتكلم بتفاصيل شوية عن أشهر الأقسام في المعهد :
《1》- قسم الأشعة :
- خريجين القسم ده بيشتغلوا في المستشفيات والمراكز الطبية والخدمية التابعة لوزارة الصحة والعدل و التعليم العالي وطبعا مختلف القطاعات الطبية
- أول ما بتتخرج علطول بتاخد تصريح لمزاولة المهنة و وبتشتغل في 80% من أنواع الأشعة وممكن بعد كده تفتح مركز أشعة خاص بيك وتكمل دراستك في كلية علوم طبية أو تكمل سنتين بكالريوس في المعهد لو مكنتش كملتهم🤓
《2》- قسم التحاليل الطبية :
- التكليف للقسم ده بيبقى في  وزارة الصحة وجميع الوزارات ال ليها خدمات طبيه، زي 《 المسشفيات العسكرية والطب الشرعي وغيرهم》💊
- ويقدر كمان خريج القسم ده يشتغل في معامل التحاليل و معامل الشركات الكيماويات و قسم التحاليل من الأقسام المهمة في التشخيص وله سوق كبير في العمل الخاص ونسبة كبيرة من أصحاب المعامل خريجي المعهد الفني الصحي.💉
《3》- قسم الأسنان :
- ببشتغل الخريج من قسم الأسنان فى المستشفيات المركزي التابعة لوزارة الصحة
- ويقدر يفتح معمل تركيبات الأسنان و يكون مسئول عن التركيبات وتجهيزها وهكذا
- بس في شرط مهم عشان تتقبل في القسم ده بيتعملك اختبار صغير كده يعرفوا انت عندك موهبة النحت ولالا لأن القسم بيعتمد بشكل كبير على المهارة دي بس متقلقش الامتحان مش بيكون صعب وتقدر تعديه بإذن الله ✔
《4》- قسم التسجيل الصحي :
- من أكتر الأقسام المريحة والتكليف بيكون في المستشفيات المركزية ووحدات الصحة، وبيكون مسئول عن تنظيم العملية الصحة إداريا.
《5》- قسم المعاونين الصحيين :
- التكليف للقسم ده ببكون في الإدارات الصحية والإشراف  على المطاعم وشركات المياه ومصانع المنتجات الغذائية وبيكون له سلطه في المنطقة ال بيتعين فيها
《6》- قسم أجهزة طبية :
- وهو من الأقسام المهمة في مجال الهندسة الطبية
-  خريجين القسم ده بيشتغلوا في المستشفيات والوحدات ومستشفيات التعليم العالى،وبيقدروا يشتغل في الصيانة او المبيعات او ممكن يشتغلوا في التصنيع ويطوروا من مشروع تخرجهم لو كان جهاز طبي ، وبيقدروا يكمل دراستهم في كليات الهندسة او العلوم الطبية.🏛
◾الأقسام كلها متاحة لعلمي علوم ما عدا قسم أجهزة طبية فهو خاص بعلمي رياضة بس ، كمان في تنسيق داخلي وكل قسم بياخد من نسبة معينة بتحددها كل جامعة 👌
- المعهد كويس جدا ومجالاته كتير وضمن النطاق الطبي كمان ومجموعه مش بيكون كبير ولا قليل وطبعا النسب بتختلف من سنة لسنة لذلك منقدرش نحددله بالظبط
◾إذا قررت تدخل المعهد لازم تذاكر كويس جدا وتتقن دراستك عشان تتقن شغلك فيما بعد وتقدر تحقق أحلامك
- آخر حاجة عايزين نقولها إن عادات وتقاليد المجتمع عمرها ما هتفيدك ولا هتحققلك أحلامك إذا كان هي بس ال مسيطرة عليك 🤞
====================
#فنون_جميلة 🖼
نفكركم بتقسيمات كليات الفنون 🎨 :
📍الفنون التطبيقية: بتقبل من علمي رياضة - علوم (واتكلمنا عنها بالتفصيل ف البوست ال فات)
📍الفنون الجميلة: ودي متقسمة لـ جزئين: (ركزوا فيهم كويس عشان هنتكلم عنهم كتير 🥱😂)
- قسم عمارة: بيقبل من علمي رياضة بس
- أقسام الفنون:
- قسم ديكور: بيقبل من علمي علوم - رياضة
- باقي الأقسام(نحت، جرافيك، تصوير): بتقبل من علمي وأدبي
📍التربية الفنية: بتقبل من جميع الشعب
🎨 فنون جميلة من الكليات ال لازم تنجح ف امتحان القدرات بتاعها (وال بيكون مختلف ع حسب القسم ال بتقدم عليه) عشان تتقبل فيها + المجموع بتاعك بناء ع التنسيق.
📍السؤال المتكرر عن فنون جميلة، هو لازم أكون باعرف ارسم كويس عشان أدخل فنون جميلة؟
زي ما شوفنا التقسيمة فوق إن فنون جميلة ف القدرات بتتقسم لقدرات عمارة وفنون، ف لو إنت مقدم لقدرات الفنون، ف آه لازم تكون عندك مهارات كويسة ف الرسم مش لازم تبقي بيرفكت بس ع الأقل عندك اساسيات كتير، لأن مقاييس القبول ف فنون جميلة من الناحية الفنية أكتر من فنون تطبيقية بشويتين 😅
ودا منطقي جدا لأن فنون جميلة اعتمادها الأكبر ع الناحية الجمالية (ال بقوانين مش الذوق الشخصي أينعم)، لكن تطبيقية فيها ناحية هندسية شوية، ف بيكون الجانب الجمالي فيها مش أهم مقياس.
لو مقدم لقسم عمارة، ف لأ مش مهم أوي لأن الامتحان بيكون مركز ع مهارات الهندسية والمنظور أكتر منها الناحية الجمالية.
📍 الدراسة:
الكلية 5 سنين..
سنة إعدادي، و4 سنين تخصص..
⚠️ السنة الإعدادي بتفرق ف دراستها ع حسب إنت مقدم على إيه 🤔
- لو مقدم عمارة: فأنت بتتخصص من أول سنة، وسنة إعدادي بيكون فيها مواد مخصصة للقسم نفسه.
زي مثلا أسس تصميم، وهندسة وصفية، وتصميم معماري.
- لو مقدم ديكور: بتتخصص بردو من اول سنة، وسنة إعدادي بتاخد فيها مواد مخصصة للقسم نفسه.
زي مثلا أسس تصميم، وإسقاط هندسي، ورسم، وتصميمات.
- لو مقدم فنون: فأنت بتتخصص من تاني سنة، وف أول سنة بتاخد مواد خاصة بال3 أقسام الفنية، فبتتأهل ليهم هم ال3 عشان كدا بيكون ليك حق الاختيار بينهم من تاني سنة 👏
زي اسس تصميم، الرسم، الحفر، التصوير، النحت، التشريح.
⚠️ زي ما قرأتوا إن في مادة اساسية لكل الأقسام وهي أسس تصميم، ودا عشان زي ما قولنا، إنها بتهتم بالناحية الجمالية المبنية ع قوانين وقواعد مش بشكل عشوائي.
⚠️ في مواد عامة ف اعدادي مشتركة بين كل الأقسام زي انجليزي وتاريخ حضارة وحقوق إنسان.
⚠️ في مواد مشتركة بين عمارة وديكور زي الفيزيا والكيميا.
📍 التخصص:
⚠️توضيح إن ف تعريفك سنوات الكلية، لما بتقول أنا أولى تخصص بتكون ف تانية جامعة لأن عندك سنة اعدادي 😅
⚠️ فنون جميلة موجودة في 5 جامعات حكومية (حلوان واسكندرية والمنيا وأسيوط والأقصر)، ومش موحودة ف جامعات خاصة.
⚠️ بيكون في تنسيق داخلي لل3 تخصصات الفنية بعد سنة اعدادي، بيكون نفس النظام بتاع ثانوي إنك بعد النتيجة بتدخل الرغبات بتاعتك وبعدين بتظهر النتيجة وبعدين بيظهر تنسيق الأقسام وبتعرف إنت اتخصصت إيه.
⚠️ الأقسام الأساسية = 5 أقسام موجودين ف كل الجامعات، في جامعات عندها تغيرات بسيطة جدا جدا هنتكلم عليها عند كل قسم.
📍الأقسام:
1️⃣ قسم عمارة: دراستهم فيها من أول سنة بتكون متخصصة ف العمارة، وكل مواد سنين الكلية بتهتم إنها تخرج مصمم معماري قادر يبقي فاهم كويس العمارة اساسها إيه وتنفيذها بشكل صح أزاي.
والخريج منها بيكون متعلم كتير عن: التصميم المعمارى، تخطيط المدن، تصميم المواقع والاسكان، تصميمات تنفيذية، المعالجة البيئية للمبانى(يعني بتعرف إيه تأثير البيئة المحيطة بالمبني على المواد ال انت مستخدمها)، الانشاء المعمارى، التجهيزات الفنية للمبانى(ودا من ضمن مميزات عمارة فنون جميلة)، المنظور الهندسى والظل، طرز معمارية، ونظريات التخطيط.
⛔ طيب إيه الفرق بين عمارة فنون جميلة، وعمارة هندسة؟
دا سؤال من الأسئلة التاريخية لقسم العمارة 😂 وال مفيش حد بيقدر يجاوب عليه إجابة جوهرية ف اساس الشغل نفسه لأنك محتاج حد يكون درس ف الكليتين ودا قد يكون مستحيل 😅 ومعظم الفروقات بتكون تقنية ف شكل الدراسة مش أكتر.
ف خلينا ف المهم إن القسم دا بيكون فرصة كويسة لل مش لحق هندسة بسبب المجموع.
2️⃣ قسم الديكور:من اسمه بيهتم بالناحية الجمالية للمكان، وشكل ديكوراته عاملة ازاي وإيه أنسب حاجة نقدر نستخدمها ف المكان ع حسب وظيفته وذوق صاحبه، سواء كانت بيوت أو محلات ومعارض، أو مسارح، أو أفلام وغيرهم.
سنين الكلية فيها مواد بتركز إنهم يكونوا عندهم معلومات كتير عن: تصميمات العمارة الداخلية، تصميمات الديكور التنفيذية، طرز التأثيت (من الأثاث)، تصميمات الفنون التعبيرية، نظريات الديكور، الاسقاط الهندسى، دراسات تحليلية، هندسة المناظر، مواصفات التخصص الفنية وحساب الكميات، تنفيذ وماكيت، تاريخ مسرح وسينما، وكاميرا واضاءة.
⛔ ف سنة 3 تخصص بتبدأ تختار شعبة تتخصص فيها أكتر ما بين شعبتين:
  أ - العمارة الداخلية
 ب - الفنون التعبيرية (ديكورات المسارح والسينما والدراما)
3️⃣ قسم الجرافيك (وال اسمه قسم التصميمات المطبوعة في جامعة اسكندرية): وبيهتم برسم الجرافيك = باختصار وببساطة إنك بتحول الرسومات الورقية بتاعتك لرسومات ديجيتال، وال بتدرس فيه مواد متخصصة جدا ف الرسم والشخصيات وغيره
⛔ ف سنة 3 تخصص بتبدأ تختار شعبة تتخصص فيها أكتر:
⚠️ جامعة حلوان:
1. شعبة الرسوم المتحركة ورسوم الكتاب (الشعبة دي موجودة ف جامعة المنيا كقسم مستقل عن قسم الجرافيك) وال بتهتم إنك تبقي خارج من الكلية قادر تشتغل شغل أنيميشن، وال بيكون عبارة عن إنك بترسم ال objects بتاعتك وبتبدأ تحركها زي ما أنت حاطط الفكرة.
2. شعبة التصميم المطبوع: وال بيكون ف البوسترات وغيره، والقصد منه إنه بيكون لقطة واحدة مش متحركة زي الانيميشن.
(باختصار زي الصورة والفيديو)
⚠️ جامعة اسكندرية متشعبة أكتر بنفس المعنى لشعب جامعة حلوان لكن المسميات مختلفة:
1. شعبة الاتصال الجرافيكي
2. شعبة رسوم النشر والصور الإيضاحية
3. شعبة الطبعة الفنية
4️⃣ قسم النحت: بتبقي قادر تنحت أشكال وأجسام للنصب التذكارية او الأماكن الاثرية والمؤسسات الوطنية سواء المحلية أو الأجنبية.
⛔ ف سنة 3 تخصص بتبدأ تختار شعبة تتخصص فيها أكتر:
1. النحت الميداني والفراغي (أن بيكون عندك مساحة فاضية زي ميدان أو مدخل قصر وهكذا وبتبدأ تقرر هتملاها بأنهي عناصر نحتية)
2. شعبة النحت البارز والميداليات (بيكون إن عندك سطح معين وتبدأ تنحت فيه الخامة الزيادة عشان ف الآخر يطلع الشكل ال أنت عايزه)
⚠️ ف جامعة اسكندرية متشعبة أكتر من كدا وبيكون في شعبة خاصة للميداليات، وشعبة خاصة للنحت الخزفي (يعني النحت باستخدام مادة الخزف)
⚠️ في جامعة المنيا عندها قسم زيادة إسمه الترميم وصيانة الآثار، هو ليه علاقة بالنحت لكن بسبب طبيعة المنيا والبلاد ال حواليها ف بيحتاجوا ناس متخصصين ف ترميم الآثار عشان آثار الأقصر وأسوان.
5️⃣ قسم التصوير (تصوير بمعنى الرسم مش التصوير الفوتوغرافي): ودا ال بيكون عندهم الجانب الفني كبيير جدا، وال بيعملوا اللوحات ال بتتباع وهكذا.
⛔ ف سنة 3 تخصص بتبدأ تختار شعبة تتخصص فيها أكتر ما بين شعبتين:
1. شعبة التصوير وال بتتعلم فيها طبيعة حية والرسم الكروكي بالقواعد الصح، والمناظر الخلوية، وكمان بتتعلم فيها ترميم اللوحات الفنية.
2. شعبة التصوير الجداري: ال بتتعلم فيها الرسم ع الجداريات والحيطان وهكذا.
 ⚠️ طبيعي جدا إنك تحس إن مش فاهم الفاظ كتير من ال اتقالت، ببساطة خد اللفظ وحطه ف الgoogle search هيطلع لك صور كتير هتفهم منها القصد من الكلام 😁👏
📍طبيعة الدراسة:
1. جزء عملي: ودا جزء كبير جدا ومهم جدا ف الكلية ف اي تخصص، ودا ال بنعمل فيه مشاريع ولوحات وبنسهر ف الكلية ونطبق ف البيت بالأيام عشان ننجزه وممكن بعد دا كله يترفض وتروح تعيده زي العسل كدا 😂😌🙊
2. جزء نظري: هو مهم جدا عشان المعلومات النظرية بتساعد ف التطبيق، لكن مش بيحتاج مجهود ومعظم الدكاترة بيكونوا مقدرين إننا مسحولين ف العملي فبيسهلوا علينا النظري 😁
=======================
كلية الثروة السمكية
◾كلية مميزة ومش معروفه في نفس الوقت ومجالها في مصر كمان تحديداً حلو جدا 👌
- بالمناسبة إزاي يبقى عندك بحرين ونيل ومتعرفش عن الكلية دي ؟🤔
《كلية الثروة السمكية 》
◾ مبدئيا الكلية دي من الكليات المستحدثة في مصر يعني اتفتحت من قريب وتحديدا سنة 2009
- وطبيعي كلية ثروة سمكية لازم تتواجد كبداية في مدينة ساحلية وكانت المدينة دي هي السويس
- بدءت الكلية في جامعة السويس وبعدها بقت موجودة في جامعة كفر الشيخ و من ثم في أسوان
- الكلية مش موجودة غير في ال 3 محافظات دول بس🤞
◾الكلية بيقدر يدخلها طلبة علمي علوم وعلمي رياضة كمان وتنسيقها عموما بببقى متوسط فبتبقى متاحة لشريحة كبيرة من طلبة الثانوية العامة 👨‍🎓👩‍🎓
◾مدة الدراسة في الكلية 4 سنين
◾بالنسبة للأقسام فهي بتختلف من جامعة لجامعة ولكن في المجمل عدد الأقسام 8 موجودين في جامعة السويس كلهم أما في جامعتي كفر الشيخ وأسوان فموجود اقسام اه وأقسام لا ❌
◾الأقسام هي :
1- قسم البيئة المائية
2- قسم الاستزراع السمكي
3- قسم تكنولوجيا تصنيع الأسماك
4- قسم العلوم الهندسية
5- قسم التنمية البشرية والاقتصاد
6- قسم الملاحة والدراسات البحرية
7-قسم الصحة وأمراض الأسماك
8- قسم المصايد
◾الأقسام كلها مرتبطة ببعض شوية وكلهم ينفعوا لطلبة علمي علوم ماعدا قسم العلوم الهندسية فهو القسم الوحيد لطلبة علمي رياضة📊
◾هنتكلم دلوقتي بتفصيل شوية عن الأقسام 👀 :
《1》- قسم الاستزراع المائي : القسم ده موجود في ال 3 جامعات وهو من أهم الأقسام الموجودة وهدفه إعداد "أخصائي استزراع مائي"، ويهتم بإنشاء المزارع السمكية، وطرق تربية الأسماك والأحياء المائية الأخرى وتفريخها على نطاق تجاري، وكذلك الاهتمام بتغذية وصحة الأسماك وتكاثرها وتفريخها.🦈
《2》- قسم الاستزراع السمكي : زي ما قولنا قبل كده إن الأقسام مرتبطة ببعض شوية فمثلا قسم الاستزراع السمكي هدفه تطوير الطاب أكتر في مجال الاستزراع المائي و زيادة إنتاج مصر من منتجات الأسماك 🐟🐟
《3》- تكنولوجيا تصنيع الأسماك : القسم ده هدفه تقليل فاقد الأسماك عن طريق إعداد الطلاب لدراسة مقررات تغطي النواحي التكنولوجية المختلفة في مجال حفظ وتصنيع وتداول وتخزين الأسماك، ومنتجاتها 🦀🐚
《4》- العلوم الهندسية : القسم ده لطلبة علمي رياضة بس زي ما قولنا قبل كده👆 القسم ده بيهدف لإنشاء المزارع السمكية وإدارتها، وحل المشكلات الهندسية في مزارع إنتاج الأسماك وإيجاد الحلول المناسبة لها🙏
◾إيه المواد ال هتدرسها في الكلية دي ؟🤔
- مقدمة في الثروة السمكية،
- بيولوجيا الأحياء المائية،
- كيمياء عضوية وتحليلية،
- البيئة المائية والتنوع البيولوجي
- ميكروبيولوجي الأحياء المائية،
 - مبادئ علم الاقتصاد
- فسيولوجيا الأحياء المائية،
- الإحصاء البيولوجي وتصميم التجارب،
 - تكنولوجيا نظم المعلومات،
- مهارات الكتابة العلمية،
- كيمياء المياه والأراضي،
- فلك الأرصاد جوية.
🚩دي المواد ال طالب كلبة ثروة سمكية بيدرسها بشكل عام بتختلف من قسم لقسم طبعا ده بجانب مواد التخصص ، مش معنى كده إنك هتدرس كل المواد دي مره واحده لأ احنا بس جمعنا كل المواد ال بتتم دراستها خلال فتره الكلية عشان يبقى عندك عنها خلفية مسبقة🙏
◾بالنسبة لمجالات الشغل 👀 :
- في مجال الاستزراع السمكي البحري، والمفرخات، بجانب العمل في مجال الغذاء الطبيعي للأسماك، ومصانع التعليب والحفظ والشركات الغذائية المختلفة 💸💸
- كمان ممكن يشتغل في مراكز البحوث، وفي مجال الجدوى الاقتصادية، والعمل في إدارة تسويق الأسماك والمصايد، وفي مجال سفن الصيد كضابط ثالث، وفي مجال تصنيع وتصميم معدات الصيد الحديثة
- شركات الاستيراد والتصدير وطبعا المصايد السمكية
- وطبعا مجال التدريس والتعيين في الجامعة🏛
◾الكلية مش صعبة ومش سهلة بس نقدر نقول إنها مميزة لأن مجالها جديد وهي ككلية مستحدثة في مصر ده بيخليها مميزة أكتر،  لازم تسعى وتبذل مجهود عشان توصل ل ال أنت عايزه 👌
   《يارب بعد كل ده تبقى عارف تفرق بين أنواع السمك بس أهم حاجة 😀》