كليات فنون جميلة طبيعة الدراسة و مجالات العمل للخريجين
الطلبة الفنانين بتوعنا اللى بيسألوا عن فنون جميلة
اه وياريت تنسى كلام الأفلام عن الكلية ..ده لمصلحتك 
اه بفهمك الليلة من الأول علشان لو دخلت متتفاجئش .
مبدأيا كده الكلية دى موجودة في 5 جامعات بس في مصر كلها وهما جامعة حلون ، جامعة اسكندرية، جامعة المنصورة ، جامعة المنيا ، جامعة الأقصر ..فل ؟!
نيجى بقى للأقسام ,, ودول اكتر من قسم فعندك يا سيدي
عمارة
وديكور
ونحت ، وتصوير و جرافيك
ونحت ، وتصوير و جرافيك دول اللي بنقول عليهم مجازا كدة قسم فنون
نيجي بقى لعلمي وادبي واللخبطة اللطيفة دية
قسم عمارة بيدخله علمي رياضة بس..
وديكور موجود لعلمي رياضة وعلوم، مش بتفرق
"وبالمناسبة يعني ديكور ممكن تدخله لو كنت أدبى بس ده متاح في جامعة اسكندرية بس"
وبتتخصص فيهم من اول سنة خالص على حسب مجموع الثانوية العامة
أما نحت وتصوير وجرافيك (الي اتفقنا اننا بنقول عليهم قسم فنون) فبتدخلهم من أى حاجة علمى أو أدبى
وملحوظه لازم نقولها هنا وهي ان فنون جميلة مش زي معظم الكليات بتدخلها وبعدين في تالت او تاني سنة تقرر هتخصص في انهي قسم فيعا
لا انت من بعد ثانوية عامة واول ما تدخلها بتخصص يا اما في عمارة او ديكور او فنون
الدراسه عموما في الكلية عملية جدا ..و بيبقى عندك3 او اربع مواد نظرى بالكتير فى الترم بس بيبقوا سهلين ومفهومين .. وغالبا مش بتحتاج كورسات كتير في الكلية .. لكن فيه كورسات معظم الطلبة بيحبو ياخدوها فى الأجازة علشان يطوروا نفسهم مش اكتر
ندخل في تفاصيل الاقسام بقي؟
نبدأ بعمارة ؟ حلوة عمارة
عمارة من فنون جميلة تعتبرهيا هياها عمارة من هندسة لكن فيه فروق بسيطة
يعنى لو لاقدر الله كنت عاوز هندسة عمارة وملحقتش هندسة ؟ ده يعتبر البديل ليك .. تدخل فنون جميلة
الميزة التانية في عمارة فنون جميلة انك بتدرس من الجانب الفنى أكتر من بتاع هندسة
واللطيف اكتر انك بتخصص في عماره من اول سنه في الكليه يعني مش زي هندسه بيقي عندك فيها سنه اعدادي بتضيعها من غير تخصص
ومع كل ده ليك الحق انك تكون عضو في نقابة المهندسين وبتتساوى شهادتك بشهادة الي في هندسة .. والفرق انه بيتذكر انك خريج كلية الفنون الجميلة ليس أكثر
وطبعا في الشغل انت وشطارتك وهو وشطارته
نيجي لتفاصيل تاني قسم؟ والي كتير بيسألو عليه وهو قسم ديكور.. وده لوحده بيتقسم لقسمين جواه وبتتخصص في واحد منهم من سنه تالته علي حسب الي تحبه فيهم ..
وعندك اول تخصص اسمه تصميم داخلى أو INTERIOR DESIGN
والتانى اسمه الفنون التعبيرية
ونبدأ ب الINTERIOR DESIGN
وده انت بتصمم فيه كل حاجة، من أول التصميمات الداخلية للشقق لغاية تصميمات واجهات البنايات وتوزيعات الاضاءة والحيز وأماكن توصيلات الكهربا على أسس علمية
وده حضرتك أما بتدخله بتتخرج معاك بكالريوس عمارة داخلية قسم ديكور (اسم ليه هيبة كدة برده )
)طيب بالنسبة للفنون التعبيرية؟
ده بقى تصميم ديكورات الأفلام والمسارح
يعنى أما بيبقى مطلوب فيلم بيتعمل في مرحلة زمنية معينة مثلا أو بيئة معينة فانت بتشوف هتظبط اللوكيشن بتاعهم ازاى بحيث يتناسب مع الفترة دى أو البيئة دى وكذلك لبس الممثلين وهكذا
.. وصلت ؟!
قولتولي وصلت
طيب نيجي لسؤال وجودي ومهم: وهو ايه الفرق بين ديكور اللى في فنون جميلة ، وديكور اللى في فنون تطبيقية ؟!
بص باختصار تعتبر فنون جميلة المخ وتطبيقية العضلات
يعني بتاع فنون جميلة يعمل التصميم وبتاع فنون تطبيقية هو اللى بينفذه وبيطلعه للحياة وكدهون
وبالمناسبة بتوع قسم ديكورفنون جميلة أخيرا وبعد طول انتظار بقى ليهم نقابة مستقلة دلوقت الي هيا "نقابة هندسة الديكور"
واخيرا ونيجي لتالت قسم واللى هنرغي فيه شوية حلوين وهو قسم فنون، القسم الوحيد اللى بتدخله سواء كنت علمى أو أدبى
والي بالمناسبه اي حد بيتخرج منه بتوع فنون بيبقا تبع نقابة الفنانين التشكيليين .. طبعا ما هما مش أقل من بتوع ديكور ولا عمارة الي كل واحد فيهم وليه نقابته
المهم ان قسم فنون بيتقسم ل 3 أقسام جوة .. جرافيك وتصوير ونحت
انت اول سنة لو دخلت فنون بتبقي سنة عامه وبتدرس فيها التلت حاجات ، ومن تاني سنة بتبدأ تخصص في واحد من التلاته زي ما انت عايز.. وفيه سنين الكلية بتمشي التخصص فيها على حسب تقديرك في سنة اولى .. يعني عندك جرافيك بياخد اعلي التقديرات بعديها تصوير وبعديه نحت وكده .. بس في الغالب حتى لو جالك قسم مش على مزاجك بتقدر تحول منها عادي
نبدأ كده باول حاجه في فنون وهو قسم بجرافيك وده بيتقسم جواه لحاجتين
تصميم مطبوع
ورسوم متحركة
التصميم ده اللى بتعمله فيه انك بتصمم سبحان الله شفت ازي؟
شفت ازي؟شغل تصميم بوسترات مواقع الانترنت والمجلات وكدهون يعني
أما بالنسبة للرسوم المتحركة
فأيوة هو اللى جه فى بالك ده كارتونات ديزنى
أنت فعلا بتتعلم فيه ازاى تعمل كارتونات وتجسم الشخصيات الكرتونيه وتحركها وكدة
طيب دول بيشتغلو فين غير ديزنى؟
دول يا سيدي بيشتغلو فى استوديوهات ومكاتب الجرافيك وشركات صناعة الكارتون التانية الي زي بتاعت ديزني
طيب كدة احنا خلصنا كلامنا الجرافيك .. ندخل على التصوير؟
وبالمناسبة قسم تصوير مش معناه تصوير بالكاميرا نهائي خالص
لا التصوير ده عندك منه نوعين:
يا اما تصوير زيت وده بتشتغل فيه أعمال زي أعمال فان جوخ ورسم وتجسيم بالزيت ورسم الطبيعه وكدة .. باختصار يعني القسم ده للي بيعشقوا حاجه اسمها رسم وده مكانهم
النوع التانى من التصوير واسمه تصوير الجدارى .. ايه ده يعني ايه؟!
التصوير الجدارى ده عارف الازاز ؟ بنجيبه ونفشفشه ونشتغل بيه زخارف شبه الزخارف الاسلامية وكدة
هييح وصلنا اخيرا لآخر قسم عندنا وهو قسم النحت
وده بتدرس فيه ازاى تشتغل نحت بارز وتشكيل فراغى
وبيتقسم عموما جواه لشعب كتير زي (خزف - و نحت عام- و نحت ميداني- و الميدالية)
والي هتلاقيهم دايسين فى الليلة دى أكتر بتوع فنون تطبيقية
نيجى لأهم حاجة دلوقت
الا وهيا اختبار القدرات والليلة الحلوة دى كلها
فبص يا فندم ..
اولاا بالنسبة لمواعيد الاختبارات فدية الوزارة بتعلن عنها وغالبا بتكون بعد ما بتخلصوا امتحانات ثانوية عامة بشوية
والمواعيد دية هتعرفها بسهولة لما تقدم وتسجل في الاختبارات فهتعرف ميعاد امتحانك امتى وفين
وعلشان تقدم على الاختبار بقى
فبتدخل على موقع التنسيق بتاع الوزارة وتكتب بيناتك المطلوبة وبعدها الموقع بيطلعلك ورقة هتروح تتطبعها
وتروح بيها على الكلية في الميعاد الي حددوده ليك في الورقة ديه
وتمتحن
خلاص قدمنا؟ نروح الاختبار بقى؟
لا يا حلو لسه
انت محتاج قبل الاختبار تاخد كورسات تأهيلية علشان تقدر تعدى الامتحانات
وغالبا كليات الفنون فى الجامعات بتاعتها بتوفرها برسوم معينة
ااو ممكن كمان تاخد الكورسات دية في اي مكان تاني بره .. بس الافضل انك تاخدها في الكليه عشان بيبقوا مفهمينك بالظبط ايه الي هيجي في الامتحان وبيدوك اسئلة زي الي هتجيلك وكده..
طيب أخر حاجة معلش زهقتكو.. وهيا الامتحان عبارة عن ايه ؟
شوفت هشغششك كمان أهو
بس الي هقولهولك ده نظام الامتحان تبع جامعة حلوان.. بس فى الاغلب كل الجامعات بتبقى مشابهة ليه.. بفرق حاجات بسيطة فاتأكد بردو من دفعات أكبر لو عرفت .. او وانت بتاخد الكورس في الكليه او بره هيرسوكوا الامتحان بيقي عامل ازي بالظبط
فاول حاجة عندك امتحان عمارة
بيجيلك فيه سؤالين
السؤال الأول انك ترسم منشأة معينة بمنظور هندسى
والسؤال التانى بيكون سؤال نظرى بيسألك فيه عن ثقافتك المعمارية وبتتكلم عن أماكن معمارية هو طالبها وكدة وده من غير رسم
طيب وامتحان فنون؟
وده بيكون 3 أسئلة
الأول تمثال او شكل وانت بترسمه بالتظليل وده سهل مش صعب زى ما انت متخيل
وتانى سؤال بيبقى تصميم لكارت بمسااحة معينة ,,أيوة حاجة شبه التصميم الابتكارى بتاع 3 اعدادى ده
والسؤال التالت بيكون ثقافة فنية .. يعني سؤال نظرى زى بتاع عمارة لكن ده بيكون عن المتاحف والمدارس الفنية وكدة وغالبا بتاخد مذكره فيها الكلام النظري ده كله
وبس يا سيدي
نصيحة عموما حاول متضيعش فرصه اختبار القدرات ديه من ايدك .. حتى لو مش حابب الكليه .. فانت مش هتبقي ضامن مجموعك.. والاختبار بيقي قبل النتيجه والتنسيق فالحق نفسك واعمله ومش هتخسر اي حاجه بس لو معملتوش ولقدر الله مجبتش مجموع يدخلك الكليه الي انت عايزاه عمرك ما هتقدر تدخل فنون جميله من غير ما تكون عامل الاختبار وناجح فيه حتى لو جايب تنسيق الكليه
واخر حاجة خالص
لان اكتر من حد سألنا على انه لازم يكون بيعرف يرسم عشان يدخل فنون جميله وان ايه عموما القدرات الي لازم تبقي موجوده فيك عشان تدخل الكليه ..؟
فبصوا عموما مفيش قسم لازم يكون بيعرف يرسم كويس غير قسم تصوير
وعموما برده فكرة الرسم الحلو دي بتيجي بعدين بالاجتهاد وبالخبره وانك تشتغل كتير على نفسك .. والدكاتره نفسهم من اختبار القدرات بيكون عندهم رؤية وحس وهتلاقيهم بيقبلوا الي عنده بذرة موهبة او ممكن يجي منه بعد كده فمتقلقش .. بس اهم حاجه لازم تبقي عندك هي الاستعداد لانك تشتغل عملي في مشاريع كتييير ورا بعض من غير ماتحس بزهق .. وخليك واثق انك لو عندك موهبة او شبه موهبه فكلية فنون جميله ارض خصبة هتزودلك الموهبة دية وتنميها ..
وبس يا سيدي ديه كل حاجه تقريبا ^^
بالتوفيق يا فنانيننا .. ومستنيين ابداعاتكم