recent
أخبار ساخنة

بالصور و الشرح - امتحانات الثانوية العامة.. آخر كلام وآخر تعليمات وآخر نصايح علشان تدخل اللجنة وتخرج بدون غلطة



بالصور و الشرح - امتحانات الثانوية العامة.. آخر كلام وآخر تعليمات وآخر نصايح علشان تدخل اللجنة وتخرج بدون غلطة






= انت هتستلم بوكليت أسئلة + بابل شيت تحل فيه أسئلة الاختيار من متعدد + ورقة تحل فيها الأسئلة المقالية + كتيب مفاهيم عبارة عن ملخص للمنهج.
= أول حاجة تعملها هتبص في نموذج الأسئلة بتاعك (أ) (ب) (ج) (د).. هتروح على البابل شيت وورقة إجابة الأسئلة المقالية تعلم على نفس رقم النموذج بتاعك (أ) (ب) (ج) (د).. وركز في الحتة دي جدا.. لأنك لما تكتب رقم النموذج بتاع الأسئلة في ورقة الإجابتين صح.. ورقتك هتتصحح على نموذج إجابة مطابق لنفس نموذج الأسئلة بتاعك (اللي انت كتبته بخط إيدك)... راجع الصور اللي منشورة مع البوست هتلاقي طريقة كتابة رقم النموذج بطريقة صحيحة.
= إيه موضوع الأربع نماذج ده؟.. ببساطة الأربع نماذج هم نفس الامتحان بس ترتيب الأسئلة مختلف.. يعني انت معاك نموذج أسئلة رقم (أ) هتلاقي السؤال الأول عندك هو رقم 15 في نموذج (ب) اللي مع زميلك اللي قاعد قدامك، ونفس السؤال ترتيبه رقم 20 في نموذج (ج) اللي مع زميلك اللي قاعد وراك.. علشان كده متحاولش تغش إجابة.. وركز كويس وانت بتنقل رقم نموذج الأسئلة في ورقة الإجابة (ورقة البابل شيت وورقة الأسئلة المقالية).. وابقى بص في الورق المنشور مع البوست.
= تاني حاجة هتروح على ورقتين الإجابة تكتب اسمك في الورقة دي والورقة دي.. وتحت اسمك تكتب اسم مدرستك في الورقة دي والورقة دي.. وبعد كده تكتب اسم الإدارة التعليمية اللي انت تابع ليها في الورقتين برضو (بص في الصور اللي تحت )
= تالت حاجة هتروح على شمال ورقتين الإجابة تكتب رقم جلوسك من الشمال لليمين.. وبعد كده تظلل رقم الجلوس في الدوائر اللي تحت (هتلاقي صورة من الصور اللي منشورة مع البوست فيها طريقة كتابة رقم الجلوس).
= بعد كده تبدأ بسم الله وتجاوب على الأسئلة.. هتروح على السؤال الأول في بوكليت الأسئلة (مثلا) هتلاقي الإجابة الصح هي رقم (ج)، هتاخد بعضك وتطلع على البابل شيت وتروح لرقم (1) وتظلل الدايرة اللي قصاد حرف (ج)، انت كده جاوبت على السؤال الأول.
= طيب لو حسيت إن الدايرة اللي انت ظللتها (ج) مش هي الإجابة الصحيحة وعايز تختار إجابة تانية؟.. بسيطة جدا.. هتروح على الدايرة اللي انت ظللتها (ج) وتعمل عليها (إكس) وبعدها تظلل الدايرة الصحيحة ولتكن الدايرة اللي قصاد حرف (ب).. راجع الصور اللي تحت هتلاقي منشور مع البوست صورة فيها الطريقة الصحيحة للإجابة وازاي تلغيها وتختار إجابة تانية.
= خد بالك.. لو ظللت دايرتين لسؤال واحد، انت هتاخد صفر على السؤال ده.. ومتقولش اللي بيصحح يختار هو الإجابة الصحيحة.. ده مش هيحصل.
= بلاش تكتب أي إجابة أو أي بيانات في ورقة الإجابة بالقلم الرصاص.. اكتب واستخدم القلم الجاف في كل كتاباتك.. وحتى لو هتبدأ تظلل بالرصاص لحد ما تستقر على الإجابة.. أوعى تسلم ورقة البابل شيت وانت مجاوب على أي سؤال بالقلم الرصاص.
= طيب هل لما أعمل كذا علامة إكس على كذا إجابة لسؤال واحد أنا كده هاخد صفر على السؤال ده؟.. لأ طبعا.. لو عملت 3 إكس على 3 دواير وظللت الدايرة الرابعة فقط والباقي إكس وطلعت الدايرة اللي متظللة هي الإجابة الصح هتاخد درجة السؤال كاملة.. متقلقش نهائي.
= هتقوللي جهاز التصحيح الإلكتروني مش بيقرأ الإجابة اللي فيها إكس.. هقولك ورقة الإجابة اللي زي كده بتعدي على ٣ أو ٤ مراحل لأنها بتتصحح بالعين المجردة، ودرجتك هتاخدها يعني هتاخدها.. ومتصدقش اللي يخوفك بكلام غير كده.
= أي إجابة هتكتبها في بوكليت الأسئلة مش هتتصحح ولا هتاخد عليها أي درجة.. الوزارة مش هتعترف بأي إجابة إلا المكتوبة في البابل شيت وورقة إجابة الأسئلة المقالية.
= بالنسبة لإجابة الأسئلة المقالية.. لو محدد لك سطرين فقط تكتب فيهم متكتبش أكتر من سطرين.. محدد لك 3 سطور متكتبش أكتر من 3 سطور.. متقولش لما أكتب أكتر هاخد الدرجة كاملة.. ده مش هيحصل وبلاش تضيع وقتك وجهدك.
= متقلقش من الأسئلة لأنها السنادي (30% أسئلة بسيطة +40% أسئلة متوسطة المستوى +30% مستويات عليا) يعني الموضوع بسيط مش مستاهل منك قلق خالص.
= نقطة مهمة: لما هتيجي تتظلم على النتيجة السنادي هتستلم صورة من بوكليت الأسئلة + صورة من ورقة إجابتك في البابل شيت + صورة من ورقة إجابتك للأسئلة المقالية + صورة من نموذج الإجابة اللي الوزارة صححت منه وانت هتقعد تصحح لنفسك وتدي لنفسك درجة الامتحان، ولو ليك نص درجة هتاخدها.. متقلقش حقك محفوظ لأن كله على المكشوف.
= جميع مواد الامتحان ليها ورقة مفاهيم ما عدا أسئلة المواد غير المضافة للمجموع.. وورق مفاهيم السنة اللي فاتت هو نفسه اللي هيتوزع على الطلبة السنادي.. لو عايز تشوف شكله وتقرأ فيه شوية ادخل على موقع وزارة التربية والتعليم هتلاقيه قدامك.. مادة مادة بحيث تتعود عليه قبل ما يتوزع عليك وانت قاعد في اللجنة.
= نقطة مهمة: لو اتمسكت بتليفون مغلق هتسقط في المادة.. لو اتمسكت بتليفون مفتوح حتى لو مستخدمتهوش في الغش هتسقط في السنة كلها في جميع المواد.. لو اتمسكت بتغش بالتليفون أو بتصور أسئلة هتسقط سنتين كاملين.. السنادي والسنة الجاية هتتحرم من دخول الامتحانات.. ركز في ورقتك فقط.. وسيبها على الله فقط.
= حاجة مهمة أخيرة: فيه لجان متخصصة من أكفأ المعلمين لمراجعة أسئلة امتحان كل مادة قبل بدء تصحيحها.. أي سؤال غير مطابق للمواصفات.. أي سؤال مكتوب بشكل خاطيء.. أي سؤال غامض لدرجة إن غالبية الطلاب جاوبوا عليه غلط.. أي سؤال له إجابتين متشابهتين لحد التطابق.. أي سؤال له أكتر من إجابة.. أي سؤال ملوش إجابة واحدة محددة واضحة.. سيتم إعادة النظر في درجة السؤال، إما يحصل عليها كل الطلاب، أو يتم توزيع درجة السؤال على درجة سؤال آخر من الأسئلة البسيطة أو متوسطة المستوى.. وقرار اللجنة دي هيطلع بعد كل امتحان.. ومتنساش إن كل سؤال في الامتحان هتلاقي الدرجة بتاعته قصاد منه.
= ربنا معاكم يا أبطال

google-playkhamsatmostaqltradent